DAKONG kawad-on sa Cagayan de Oro City Police Office (Cocpo) ang kamatayon ni Police Colonel Nelson Aganon, city director, tungod kay dako ang nahimo niini pag-ubos sa krimen sa siyudad.
Gibutyag ni Police Major Rey Gaudencio Taboclaon, officer-in-charge nga tigpamaba sa Cocpo, nga ilang giisip nga dakong kawad-on sa hanay sa kapulisan si Aganon.
“Dako gyud nga loss kibale kaayo nasayod ta nga naay pag-ubos sa atong crime volume daghan sab nga mga wisdom brotherly and fatherly advised si Colonel Aganon nga gihatag sa amo nga makakuha ta og mga leksiyon, mao nga among giisip nga dako gyud nga kakulangon,” matud ni Taboclaon.
Apan bisan pa man niini dili usab kini pasabot nga mahunong na ang pagserbisyo ug obligasiyon sa kapulisan ngadto na sa katawhan sa siyudad diha sa paghatag og seguridad ug pagmintenar sa kahusay ug kalinaw.
Gidugang pa nga nagmasub-anon ang kapulisan apan padayon gihapon kini ilabi na nga ang mandato ni Aganon mao man ang paghatag og tinud-anay nga pagpanerbisyo.
Samtang gipasalig usab sa officer in charge isip city director nga si Police Lieutenant Colonel Reynante Reyes nga bisan pa man sa kasub-anan padayon nga gihatagan og prayoridad ang pagserbisyo sa siyudad.
“We are all sadden of the demise of our city director in as far as our duty is concern wala man po'y kausaban padayon kami, we're always getting instructions coming from the higher office, rest assured that the people of Cagayan de Oro will be always our top priority sa among serbisyo,” matud ni Reyes.