TULO ka mga lalake, lakip na ang usa ka gidudahan nga miyembro sa usa ka international drug syndicate, nasikop sa kapulisan human nasakpan sa akto nga namaligya og ginadiling drugas sa Barangay Dumlog, Siyudad sa Talisay City ala 1 sa kaadlawon sa Huwebes, Hunyo 6.
High-tech kaayo ang pagpamaligya ug transaksyon kay gipaagi sa messaging application.
Usa sa mga nasikop nga si Mark Anthony Navarrete Toh, 28, kasamtangan residente sa Deca Homes Phase 1, sa maong barangay, giila sa kapulisan nga miyembro sa usa ka dakong sindikato nga nagbase sa Dubai.
Matod ni Police Lieutenant Colonel Marlu Conag, hepe sa Talisay City Police Station, nagpahigayon sila og buy bust operation batok ni Toh human sila nakadawat og mga report kabahin sa iyang mga ilegal nga kalihukan.
Sa dihang gipahigayon nila ang operasyon, ilang nasikop si Toh ug kaubanan niini nga sila Ruferd Gella, 32, residente sa Barangay Lagtang, siyudad sa Talisay; ug si Juanito Amahan Jr., 34, taga Felina Village, Barangay Labangon, siyudad sa Sugbo.
Nakuha gikan kanila ang 21 gramos nga gidudahang shabu nga nagkantidad og P145,860.
Sigon ni Conag nga base sa ilang inisyal nga imbestigasyon, si Toh kay giingon nasikop ug napriso na didto sa Dubai human nalambigit sa pagpamaligya og ilegal nga drogas niadtong 2017.
Napriso si Toh og lima ka adlaw sa Dubai sa wala pa siya na-deport balik sa Pilipinas.
Pero bisag na-deport na si Toh sa Pilipinas, nagpadayon gihapon ang ilegal nga kalihukan niini samtang nagpuyo siya sa Batangas.
Matod pa ni Conag, kasagaran ang ilegal nga transaksyon ni Toh kay ipaagi sa WhatsApp, usa ka social messaging application.
Sigon ni Conag nga usa ka Pakistani nga nagbase sa Dubai ug kaubanan niini nga Pinoy ang kuhaanan og drugas ni Toh.
Gikatakda nga mopasaka sila Conag og kasong paglapas sa Republic Act 9165 batok ni Toh ug iyang kaubanan.