GAWAS sa NBA finals tali sa Golden State Warriors ug Toronto Raptors, tingali ang laing gikahinaman labina sa mga mahiligon sa indigay sa kaanyag mao ang Bb. Pilipinas 2019 pageant karong Dominggo.
Kon wala ko masayop, upat ka mga Cebuana ang nalakip sa napili nga kandidata pero wa pay seguro kon madala ba sila sa 25 nga magtigi alang sa mga korona nga giandam.
Sama sa niaging mga edition, gihulagway nga kini nga batch mao ang labing maayo. Pero alang nako, kadtong nakapalugwa og mga runners-up ug mga mananaug sa gawas sa nasud, mao gyud ang maayong batch.
•••
Nagsugod na ang pag-ani ni Arjo Atayde og acting awards. Nahukman siya nga best supporting actor sa niaging 35th PMPC Star Awards tungod sa iyang pag-arte sa pelikulang Buy Bust nga gibidahan ni Anne Curtis.
Akong na-imadyin nga makadaug usab si Arjo og award sa iyang papel isip Eli sa The General’s Daughter nga gibidahan ni Angel Locsin.
•••
Sa way lipodlipod, giangkon sa UST Golden Tigress spiker ug UAAP Season 81 Most Valuable Player nga si Cherry Ann ‘Sisi’ Rondina sa programa nga Tonight With Boy Abunda nga dihay higayon nga nadala siya sa mga suliyaw ug mga pagdayeg sa iyang mga magdadayeg.
Kini iyang giingon nga naka-offend sa iyang coach kay medyo nidako ang iyang ulo. Maayo na lang kay nakaamgo siya samtang di pa uwahi ang tanan.
•••
Hangtud karon si Maja Salvador pa gihapon ang akong bet alang sa papel nga Darna. Niadtong Dominggo sa iyang sayaw sa Asap Natin ‘To, headdress na lang ang kulang, Darna na gyud siya tan-awon.
Sa laing bahin, sa mga esena ni Angel Locsin sa The General’s Daughter diin giingong siya gyud mismo ang nibuhat sa mga lisod nga stunts, nakaingon ko nga morag kaya na man tingali niyang modala og balik sa papel nga Darna.
Pero samtang wa pay official statement ang ABS-CBN ug Star Cinema, magpabilin tang magnganga nga maghulat kinsa gyud ang final nga motulon sa bato, motuyok ug dayong singgit og ‘Darna’!
•••
Samtang daghan ang ganahan maminaw sa mga mag-aawit nga maayo kaayong molikoliko sa tono sa usa ka awit o kanang gitawag og ‘kulot,’ ako di. Magsipok akong ulo kay alang nako giguba sa mag-aawit ang kanta.
Parehas adtong gihimo nila ni Angeline Quinto ug Regina Velasquez sa kantang I Know Him So Well adtong Dominggo. Layo ra kaayo sa orihinal ni Elaine Page.