SECTIONS
Monday, June 24, 2019
SUPERBALITA CEBU

Super Suroy: Forbidden City Hari-anong dapit sa China

SA KADTONG wa masuheto sa kasaysayan sa “Forbidden City” (Palace Museum) nga nahimutang sa 4 Jingshan Front Street, Dongcheng Qu, Beijing, China hinaot nga kining artikulo magsilbing giya sa higayon nga maka-suroy kamo sa maong lugar.

Ang makasaysayonang dapit nalakip sa talaan sa UNESCO isip World Cultural Heritage Site niadtong 1987 ug karon giila nga usa sa labing sikat nga tourist attractions sa tibuok kalibutan.

Gi-ila usab kini nga world’s largest palace complex nga gitukoran og 9,999 ka buildings (numero 9 giila nga suwerti nga numero sa mga Instik) nga gilibutan sa 32-foot nga gihabugon sa paril.

Kon nakahinumdum mo sa pelikulang “The Last Emperor” niadtong 1987 sagad sa mga eksena niini gihimo sud sa Forbidden City.

Katukoran

Ang naasoyng palace complex gisugdan sa pagtukod niadtong tuig 1407 atol sa Ming Dynasty ug natapos human sa 14 ka tuig niadtong 1420 diin milyon ka mga trabahante ang nag-antos sa long-term hard labor.

Mga bato nga gigamit gimano-mano og kuha sa Fangshan District nga adunay dul-an sa 40 kms ang gilay-on ug daghang punoan sa kahoy ang gipamutol og gibiyahe gikan pa sa lagyong probinsiya sa China aron gamiton sa maong construction.

Gawas niini, ubang materyales nga gigamit sa construction naglakip sa marble stones, kahoy nga giila nga precious Phoebe zhennan wood ug golden bricks.

Samtang 90 porsento sa atop sa matag palasyo gigamitan og glazed yellow tiles kay ang kolor nga yellow giila nga official color sa mga Chinese Emperors.

Ang kinatibuk-ang complex nga rectangular shape adunay sukod nga 720,000 sq. mtrs. o 7,800,000 sq.ft.

Kasaysayan

Ang imperial palace nagsilbi kaniadto nga sentro sa politika sa maong nasud atol sa Ming ug Qing dynasties (1368-1911) ug nganong gihinganlan kini og Forbidden City kay kaniadto ang mga ordinaryong tawo gidid-an nga makasud sa maong dapit ilabi na nga way pagtugot sa emperador.

Bugtong mga sakop lang sa imperial families ug tag-as nga opisyal ang adunay access sa maong lugar ilabi na nga nagsilbi kini kaniadto nga pinuy-anan sa mga Chinese emperor uban sa ilang mga pamilya, staff ug government officials.

Gibahin ang complex sa inner court ug outer court samtang ang eastern ug western nga bahin niini nga nasakop sa inner court maoy puy-anan sa mga niretiro na nga emperor ug empress.

Tourist attractions

Pagsulod pa lang nimo sa ganghaan mangangha ka sa makita nga royal architectural wonders sa mga Chinese gikan sa bungbong ug sa paghangad sa atop nga bahin makapanglad-ok ka sa intricate o detalyado nga desinsyo gikan sa painting ngadto na sa mga kinulit nga kahoy.

Base sa museum curator sa Forbidden City nga kapin sa 14 milyones nga mga turista ang moduaw sa maong dapit matag tuig, gani niadtong niadtong Disyembre 13, 2018 niabot sa 17 million ang misuroy.

Nagkinahanglan og passport sa matag bisita aron makasulod sa area ug ang sa pag-book og tickets diin adunay taas nga kutay sa mga tawo ang nagpaabot.

Atol sa akong pagduaw sa miaging buwan mokabat sa sa 60 rmb/yuan (P450) ang matag ticket diin ilang kuhaon ang passport number nga gamiton sa imong pagsud na sa entrada.

Tips

Alang niadtong nagplano nga mosuroy sa Imperial Palace Museum pagsul-ob og hayahay o komportable nga sinina apan dili kadtong law-ay ingon man rubber shoes kay siguradong taas-taas ka og baktason hangtod na ngadto sa exit area.

Pagdala og tubig imnunon mamahimo sab nga makapalit og imnunon ug pagkaon sa sud nga bahin kay adunay mga tindahan ug coffee shops.

Labaw sa tanan ikondisyon ang kaugalingon ug ang lawas gikinahanglan nga mopabuhagay mong daan sa sugo sa lawas tungod kay ang comfort room nahimutang sa tumoy nga bahin sa maong dapit.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph