NAHUMAN na ang summer, diin gi-welcome na nato ang ulanong panahon.
Apan wa pa man gyud matagbaw sa bakasyon, lami ang molaag uban ang tropa.
Sa atong Laag Ta karong adlawa, usa ka grupo ang mipaambit sa ilang recent pagsubida sa Sicao Falls.
Ang busay makita sa Sicao Village, Barangay Tamayong Calinan, dakbayan sa Davao.
Take note, di sayon ang binaktasay padung sa busay, apan suma pa, worth it ang tanang kahagu nimo padung sa dapit.
“Pirti kahago. Ang uban, naligid, slide padaos-os na lang mahadlok na mabundak pero sulit,” suma ni Trexie Dots Harmony.
Tungod di tiaw ang binaktasay, ayaw og dahum sa tul-id nga dalan, anaa diha ang excitement sa mga libaong, lapuk ug “buhis-buhay” nga dalan.
Sa mga buot makasud-ong sa kaanyag sa Sicao Falls, gikan sa Calinan Proper, sakay og motor o pedicab ngadto Purok 6.
Gikan sa purok, mobaktas ka pa-Sicao og sobra usa ka oras, kung swertehon nga maka-hits mas maayo.
Pag abot sa Sicao Village, adunay tribal stop-over alang sa registration.
Ug gikan sa Sicao Village, i-andam ang ginhawa sa halos tulo ka oras nga binaktasay padung mismo sa Sicao Falls.
Exciting no?
Sa pag-abot nimo sa lugar, daghan og gidili.
Sama na lamang sa paghugaw-hugaw. Gipreserba ang lugar tungod kini usa ka Water Conservation Area.
Kinsa mang makalapas dunay multa. Gidili sab ang pag-hunting sa mga wild animals nga makita sa dapit.
May gibutang sab nga tent area alang ngadto sa mga buot mopahuway o kadtong magabhian sa pagsubida.
Ready na, Laag Ta!