SUKAD nga gipatuman ang “No Helmet, No Lingap” ug “Drink, Drive and Meet an Accident, No Lingap” nga polisiya, mas nikubos kadtong nangayo og tabang sa Lingap Para sa Mahirap.
Gitug-an ni Lingap Para Sa Mahirap Center ug Malasakit Center in-charge Josephine Matiran nga ang lokal nga kagamhanan nakatigum og P50,000 hangtud P100,000 matag adlaw sukad nga ang polisiya gipatuman.
“Niubos ang nag-avail sa Lingap (nga mga misupak sa polisiya). Nibaba siya compared to normal. Dako ang gibaba, mga 70 percent prior to wala campaign,” tug-an ni Matiran niadtong Huwebes atol sa iSpeak media forum sa city hall sa dakbayan sa Davao.
Matud niya nga ang center makadawat gihapon og mga 10 ka hangyo sa mga molupyo sa siyudad. Apan giklaro ni Matiran nga istrikto niining gisalikway ang aplikasyon.
Gikanayon sab niya nga ang polisiya alang sa drayber ug pasahero.
“Pero tong mga law abiding pero naaksidente, of course, we will cater them. Makita man na sa bill,” punng ni Matiran.
Ang Lingap usa ka programa sa lokal nga kagamhanan nga mohatag og tabang pinansiyal ngadto sa mga kabus nga molupyo alang sa pagpa-ospital ug dialysis, paglubong, subsidiya sa tambal.
Gisulti ni Mayor Sara Duterte-Carpio nga kanunay niyang gibalik-balik sa iyang mga pamahayag nga ang siyudad di magtugot niadtong mga pasyente nga maaksidente tungod sa ilang pagpasagad. (RGL)