SI RHONA Goc-ong-Villariasa sa Sunstar Superbalita Davao maoy usa sa mga nakadawat og Centenial Journalism Awards sa Rotary Club of Manila (RCM).
Si Villariasa gipasidunggan isip Regional Female Reporter of the Year sa print category kagahapon, Huwebes, Hunyo 6, sa New World Makati Hotel, Manila.
Ang Journalism Awards ihatag sa mga personalidad sa media kinsa padayon nga nag-alagad isip inspirasyon alang sa daghang mga manunulat aron nga himuon ang tri-media usa ka paagi aron nga hisgutan ang mga isyu nga dunay nasudnong kahulogan.
Nahimo sab kining pinakapinaabot nga “award giving ceremony” alang sa media outfit, naglakip sa radio broadcast, television program o newspaper.
Gipasalamatan ni Villariasa ang RCM sa pag-ila sa iyang kontribusyon ngadto sa industriya.
“I never dream of getting an award with what I do,” matud niya sa iyang Facebook post.
Si Villariasa, kinsa naa na sa industriya kapin 10 anyos na, niangkon nga wala siya nagdahom nga mahimong manunulat.
“Coz for me just do ur job and if you will be recognize plus points na un. [sic],” dugang pa niya.
Iya sab nga gitimbaya ang iyang mga kaubang Mindanawon nga nidawat sa maong pasidungog sama nila Carmelito Francisco sa Mindanao Times, Gem Avanceña sa TV5, Jun Digamon sa Brigada News FM Davao, ug RMN Davao.
Ang pasidungog naatol sa centenial celebration sa organisasyon. (Ralph Lawrence G. Llemit)