UPAT ka mga drayber og traysikel nagpositibo nga naggamit og ilegal nga druga human ang surprisa nga drug test atol sa education campaign sa Davao City Transport and Traffic Management Office (CTTMO) sa mga drayber sa public utility vehicle (PUV) sa Davao City Recreational Center Huwebes, Hunyo 6.
Kinatibuk-ang 280 public utility jeepney (PUJ) ug drayber sa traysikel nipailawom sa “on-the-spot” drug testing ug sa maong ihap, upat nagpositibo.
Kadtong nagpositibo sa inisyal nga “screening”, gipailawom sa “counseling” sa Preventive Education and Community Involvement (Peci) officer ug Philippine Drug Enforcement Agency (PDEA) Children and Women Welfare officer. Giduso sab sila ngadto sa Davao Cadac alang sa saktong interbensiyon, apan ang ilang driver’s license gisakmit gilayon sa LTO ug gisuspende hangtud nga mapailawom sila sa rehabilitasyon o reformation program sa pagpakig-alayon uban sa Department of Health o local government units.
Si PDEA-Davao director Antonio Rivera nagkompirma Huwebes nga ang mga drayber, nga wala niya gipanganlan, nagpositibo human nga gisusi ang ilang “sample” nga ihi sa personahe sa PDEA.
Gi-target sa PDEA ang mga drayber sa ilang mga suprisa nga drug test aron nga maseguro nga naa sila sa maayong “mental” nga kondisyon ug way inpluwensiya sa ilegal nga druga kon mobiyahe sa mga kadalanan.
Ang maong operasyon gipatuman subay sa probisyon sa Republic Act 10586, o ang Anti-Drunk and Drugged Driving Act of 2013, o “an act penalizing persons driving under the influence of alcohol, dangerous drugs, and similar substances, and for other purposes which seek to minimize drug-related road accidents”.
Kini sab kabahin sa gipahugtan nga paggukod sa gobyerno batok sa ilegal nga druga.
Atol sa ilang Oplan Harabas niadtong Mayo, duha ka drayber ang nagpositibo nga naggamit sa ilegal nga druga sa 272 kinsa nipailawom sa suprisang mandatory drug testing.
Base sa rekord sa PDEA-Davao, nagpakita kini nga sukad Mayo 18 karong tuiga, nilusad sila og 41 ka operasyon, 271 joint operations uban sa 430 indibiduwal nga nalambigit sa ilegal nga druga ang nadakpan. Atol sa maong operasyon, 18 napatay samtang 15 nagpabiling gawasnon.
Alang sa ilegal nga druga nga ilang nasakmit, 2,875.47 gramos sa shabu, 12,846 gramos sa Marijuana, 17,000 Marijuana Hills gipangdaut ug 46 nga nasakmit nga kinilo nga cocaine.