MAASIN CITY, Leyte - Usa ka giilang high value target drug personality ang napatay sa usa ka anti-illegal drug operation sa Maasin City, Southern Leyte niadtong Miyerkules sa buntag, Hunyo 5.
Giila ang napatay nga suspek nga si Antonio Espera alyas Lansoy, taga Sitio Tubli, Barangay Tigbawan, Maasin City.
Ang operasyon gipangunahan ni Police Lieutenant Wilfredo Camaso sa Southern Leyte Provincial Drug Enforcement Group uban sa Maasin Police, Provincial Intelligence Branch, Regional Intelligence Unit ug Philippine Drug Enforcement Agency.
Ang operasyon nahitabo sa Barangay Pasay, Maasin City, alas 11:25 sa buntag, Miyerkules, Hunyo 5.
Matod sa kapulisan, giila nga usa ka high value target level 2 si Espera.
Matod sa report sa Police Regional Office 8, usa ka poseur buyer ang positibong nakapalit sa suspek og lima ka pakete sa gituhoang shabu.
Sa dihang natunol na sa buyer ang marked money, nakabantay ang suspek nga pulis ang iyang ka transaksyon.
Nibunot kini og una sa iyang armas ug nisuway pagpamusil apan naunhan kini sa mga operatiba.
Nakaangkon og mga samad pinusilan ang suspek ug dali gidala sa Southern Leyte Yniguez Memorial Provincial Hospital apan gideklarar kini nga dead on arrival.
Narekober sa kapulisan gikan sa suspek ang laing upat ka pakete sa gituhoang shabu; usa ka revolver nga dunay 5 ka fired cartridge case ug 1 ka buhing bala; duha ka basiyo sa bala; salapi nga P4,783 ug motorsiklo.
Padayun karon gisusi sa kapulisan ang mga koneksyon sa ilegal nga kalihukan sa suspek. (JKDP)