ANG pisikal nga kahimtang sa kasapaan sa Central Visayas miarang-arang nag maayo samtang ang mga basura nga naa sa katubigan miminos human sa lapad nga pagpanglimpyo.
Si Regional Executive Director Gilbert Gonzales sa Department of Environment and Natural Resources (DENR) niingon nga ang mga residente duol sa kasapaan nanghunong na sa pagpanglabay sa ilang mga basura ngadto sa sapa.
Matod ni Gonzales nga bisan kon ang kalidad sa tubig miarang-arang na, gikinahanglan gihapon ang paghimo og mga lakang alang sa sewerage systems ug butangan og sewage treatment plans ang mga siyudad ug kalungsoran nga dunay naglagbas nga kasapaan.
Si Gonzales niingon nga ang mga local government unit (LGU) nanglimpyo usab ug nang-rehabilitate sa kasapaan, sama sa Siyudad sa Sugbo nga nanglimpyo sa Guadalupe ug Lahug river.
Ang Dakbayan sa Mandaue nanglimpyo usab sa Butuanon river.
Siya niingon nga dunay 33 ka mga dagkong sapa nga giila dinhi sa rehiyon 7, gawas sa 10 ka mga sapa nga unang gi-rehabilitate ubos sa Rivers for Life Program.
Ang 10 ka river systems naglakip sa Abatan River, Inabanga River and Manaba River nga pulos naa sa Bohol; Banica River, Panamang-an River ug Sicopong River nga naa tanan sa Negros Oriental; Bulacao River, Butuanon River, ug Luyang River tanan sa Cebu; ug Señora River sa Siquijor.
Ang DENR 7 nagsugod sa paglimpyo sa 10 ka dagkong mga sapa sa rehiyon 7 ug nakakabig og suporta gikan sa mga LGU, mga ahensya sa kagamhanan ug pribadong sektor sa pagpalambo ug pag-rehabilitate ning mao nga mga sapa.
Matod ni Gonzales nga nakamatngon na ang katawhan ug duna nay suporta alang sa pagpalambo sa kalidad niini human gilusad sa DENR ang Rivers for Life.
Matod ni Gonzales nga ilang na-rehabiltate ang Guadalupe River pinaagi sa memorandum of agreement (MOA) nga gipirmahan ni Gonzales, EMB 7 Director Conado, BIMP 7 Director Paulino Moreno Jr. ug Guadalupe Barangay Captain Michael Gacasan.
Sa miaging tuig, si DENR Secretary Roy Cimatu nihulga nga hulipan ang mga opisyal sa DENR nga mapakyas sa paglimpyo sa mga sapa sulod sa ilang area of jurisdiction. (EOB sa SunStar Cebu)