HIMUON ni Talisay City Mayor-elect Gerald Anthony “Samsam” Gullas, Jr. nga co-terminous nga mga empleyado ang mga sakop sa City of Talisay-Traffic Operations Development Authority (CT-TODA) ug magkuha usab siya og traffic czar aron pagsulbad sa taudtaod nang suliran sa trapiko sa dakbayan.
Matod niya, maghimo sila og criteria kon kinsa ang angay ibutang sa CT-TODA nga takos ug maalamon nga modumala sa kahimtang sa trapiko sa Talisay.
Iyang gitahasan si Rogelio Villaver, pangu sa CT-TODA, nga maghimo og mga lagda kon kinsa ang angay ipasud sa maong buhatan.
“I want them to be high morale and they know they have a job to be done because there are the frontliners of Talisay when it comes to the traffic problem of Talisay,” sigon sa outgoing nga kongresista dihang nahinabi sa mga tigbalita sa wala pa ang oathtaking sa mga opisyal nga nakadaog sa miaging piniliay niadtong Mayo 13 sa Carcar City Hall niadtong Huwebes, Hunyo 6.
Duna na siya’y nahunahunaan kon kinsa ang iyang itudlo isip traffic czar sa siyudad, apan wa una niya kini nganli.
Makiglambigit usab siya og mga ahensiya sa kagamhanan sama sa Land Transportation Office aron mapaubos sa insakto nga seminars ug training ang mga traffic enforcer.
Gusto niya ipaseguro sa mga kapitan sa mga barangay nga butangan og mga tanod ang mga eskina sa mga barangay sa siyudad sama sa San Roque sa Cebu South Coastal Road C(SCR), Cansojong, San Isidro, ug Lawaan I ingon mana ang mga eskina sa Starmall, St. Thomas Aquinas School ug Tabunok.
“Specific plans sa specific barangays in specific corners because we cannot have a one-size fits all plan para sa tanang eskina. Lahilahi gyud na kun kinahanglan magtinabangay gyud na,” dugang ni Gullas.
Siya nibutyag nga nakigtagbo na usab siya sa mga department heads sa city hall.
Duna siyay eight-point agenda apan prayoridad niya ang pagsulbad sa tulo ka mga butang- ang basura, baha ug trapik.
Tan-awon usab niya ang master drainage plan ug aksyonan kon unsay kinahanglan nga himuon nga
mohaom sa kasamtangan nga kahimtang sa siyudad ug maabot sa ilang budget.
“We don’t want band-aid solutions to fix the flooding problem in Talisay,” dugang ni Gullas.
Siya nanumpa atubangan ni Mayor Nicepuro Apura sud sa Carcar City Hall niadtong Huwebes, Hunyo 6, tupad sa iyang asawa nga si Rhea.
Nisaksi usab ang iyang apohan nga si incoming Rep. Eduardo Gullas, Provincial Board Members Yolanda Daan ug Raul Bacaltos ug ang mga nidaog pagka mayor sa unang distrito sa Sugbo sa miaging piniliay niadtong Mayo 13.
Nagpasalaaaton siya sa halapad nga suporta sa katawhan sa Talisay hinungdan nga nidaug sa pagka mayor sa dakbayan ubos sa makabuhong nga mayoriya. (SCG)