GIPAIMBENTARYO na ni outgoing Bise Gob. Agnes Magpale ang mga resolusyon ug ordinansa nga napalabang sa Hunta Probinsiyal ubos sa iyang pagdumala niini.
Kini aron itaho ug i-turnover ngadto kang incoming vice governor Hilario Davide III ug sa mga bag-ong mga board member, nga mao ang molangkob sa 15th Sangguniang Panlalawigan.
Matod ni Magpale, importante kini aron mahibalo sila sa mga existing nga mga lagda ug malikayan usab nga magdoble kini ingun man aron mahibaw-an kung asa nga mga komitiba gipang-refer ang mga pending nga ordinansahon ug pending resolutions.
Gipasabot hinuon sa outgoing presiding officer nga ang mga ordinansahon nga natanggong ug subject na unta sa second reading, kinahanglang i-refile sa hingtungdang board member sa pagsulod sa bag-ong set sa mga opisyal.
“Kung naay pending, i-re file gyud na nila. But just the same, I think I owe it to the next presiding officer to let him know,” padayag ni Magpale.
Moabot sa 8 ka tuig nga nahimong presiding officer sa Hunta Probinsiyal si Magpale apan una na siyang nahimo nga board member sa 5th district.
Nahimo siyang bise gobernador niadtong 2011 hulip sa namatay nga si Gregorio Sanchez, Jr. samtang napili siya alang sa susamang posisyon niadtong 2013 ug nilingkod sulod sa 2 ka termino.
Matod ni Magpale nga sukad sa iyang pagka-bokal hangtud sa iyang pagka-bise gobernador, lakip sa iyang nag-una nga mga kalampusan ang pagka-establisar sa Women’s Code ug Children’s Code ingun man sa Tourism Code ug sa Paglaum Scholarship Program.
Panghinaot ni Magpale nga ang mosunod nga mga sakop sa Hunta Probinsiyal magpabiling independent ug siguruon patas ang ilang pagtagad ngadto sa tanan.
“And I’m proud to say, I think I handled it very well. I never banged the gavel to declare anyone out of order even when there were times nga medyo heated na, labi na towards the last 7 months but I never did. To me, that’s a great achievement already. And I thought I gave everybody a fair chance,” niingon si Magpale. (AZLG)