USA lang sa 15 ka taas nga mga posisyon sa mga siyudad ug kalungsuran sa unang distrito sa lalawigan sa Sugbo ang wala makuha sa Alayon/Nacionalista Party (NP) sa miaging piniliay niadtong Mayo 13.
Sa 15 ka mga pwesto sa pagka kongresista, provincial board members, mayor ug bise mayor, ang nidaog sa pagka bise mayor sa lungsod sa Minglanilla mao lang ang dili kaalyado sa partido.
Si Loben Geonzon, pambato sa Nationalist People’s Coalition (NPC), ang nipildi ni incumbent Bise Mayor Robert John Selma, pambato sa NP sa pagka bise mayor.
Si Geonzon nakakuha og 23,541 ka mga botos batok ni Selma nga may 22,172 ka mga botos.
Apan gipasigarbo ni Talisay City Mayor-elect Gerald Anthony “Samsam” Gullas Jr., nga naharos sa ilang partido ang unom ka posisyon sa pagka mayor sa unang distrito.
Sa pagka kongresista, si Eduardo Gullas samtang sila si Yolanda Daan ug Raul Bacaltos nasublian sa pwesto sa pagka provincial board members.
Sa pagka mayor, sila si Elanito Peña sa lungsod sa Minglanilla, Valdemar Chiong sa City of Naga, Lakambini Reluya sa lungsod sa San Fernando, Mercedita Apura sa siyudad sa Carcar ug Lionel Bacaltos sa lungsod sa Sibonga.
Sa pagka bise mayor, sila si Alan Bucao sa Talisay, Kristine Chiong sa Naga, Nicepuro Apura sa Carcar, Ricci Reluya sa San Fernando, ug Dotis Laude sa Sibonga.
Samtang nanumpa si Ricci, naghawid usab sa larawan sa iyang amahan nga si Ricardo “Nonoy” Reluya ang iyang inahan nga si Lakambini.
Ang anak maoy ni-substitute sa iyang amahan human kini gi-ambush niadtong Enero 22, 2019 sa siyudad sa Talisay.
Kadaghanan sa mga konsehal sa mga lungsod ug siyudad kay mga kapartido usab nila.
Ang mga nidaog pagka bokal, mayor, bise mayor, ug mga konsehal nanumpa atubangan ni Samsam sud sa Carcar City Hall niadtong Huwebes, Hunyo 6.
“Kon magpabilin ta nga lig-on, ang mga national pa mao nay moari diri nato mangayo og tabang. Karon nga eleksyon, gipakita nato nga kon mobarog ang grupong NP/Alayon, makapadaog man gyud diay sila og kandidato,” dugang ni Samsam. (SCG)