TINGUHA karon sa kampo ni Governor-elect Gwendolyn Garcia nga isibog sa mas sayo nga petsa ang turnover sa posisyon ug mga dokumento sa Davide administration ngadto na sa iyang liderato.
Matod ni Atty. Frank Dinsay sa transition team ni Garcia, nga inay sa Hunyo 28, nihangyo sila sa transition team ni Gobernador Hilario Davide III nga himuon na kini sa Hunyo 27.
Base sa Department of Interior and Local Government (DILG) Memorandum Circular 2019-39, kinahanglang dunay turnover ceremony nga pagahimuon sa Hunyo 30 alang sa briefing sa unod sa mga report ug pagtaho sa mga hagit nga posibleng atubangon sa bag-ong administrasyon.
Tungod kay natumong nga Domingo ang Hunyo 30, ang Davide administration nihukom nga sa Biyernes kini himuon, Hunyo 28.
Apan sigun ni Dinsay nga tungod sa kadaghang mga dokumento nga kinahanglang i-turnover ngadto sa bag-ong administrasyon, taas sab nga panahon ang kinahanglan sa Garcia transition team sa pagtuon sa unod niini.
Kon masayo sa paghatag, hayan makwestiyon pa nila kini ug matubag usab sa hingtungdang department head o opisyal ang ilang mga pangutana.
“We believe man gud that the turnover is for the present administration. You have to remember there are officials there that are co-terminus with the governor,” niingon si Dinsay.
Base gihapon sa memo sa DILG, lakip sa mga i-turnover sa Local Governance Transition Team sa kasamtangang administrasyon ngadto sa bag-o mao ang inventory sa mga LGU property, Governance Assessment Report ug Commission on Audit o COA Report sa 2018.
Lakip usab niini ang mga kontrata, loan agreements, Comprehensive Development Plan, Local Development Plan, Annual Investment Plan for 2019 ug uban pa.
Ang Garcia transition team wa pa hinuon makakuha og positibong tubag, apan posible kining mahibaw-an atol sa laing tigum nga himuon sa duha ka mga habig karong adlawa, Hunyo 7, kauban usab ang tinugyanan sa DILG.
Nasayran hinuon gikan sa usa ka kasaligang tinubdan nga di available si Davide sa Hunyo 27 kay dunay laing schedule sa maong adlaw. (AZLG)