GIPADAYAG ni Sr. Insp. Matt Reil Pono, fire marshal sa dakbayan sa Carcar, nga dili makatarunganon ang pagmahay nila sa pipila ka mga opisyal sa Barangay Guadalupe ug kagamhanan sa samang siyudad nga dugay sila nakatubag sa alarma sa sunog niadtong Hunyo 1 pasado alas 4 sa hapon.
Giangkon sa mga opisyal sa Bureau of Fire Protection (BFP) sa Carcar nga depektuso na ang ilang tulo ka kasamtangan nga firetrucks.
Apan sumala ni Pono dili lang trabaho sa mga bombero ang pagpalambo sa ilang kagamitan kondili nanginahanglan usab sila og suporta ug ayuda sa mga opisyal sa Carcar ug katawhan aron mas epektibo ug paspas ang ilang pagtuman sa ilang gimbuhaton.
“Frustrating sa among part kay igo lang sila pagmahay sa amoa which is in fact gi-risk namo among life para makarespondi ngadto. Wa gani mahibawo mapagngan ug mahaybol ang truck, pwedeng madisgrasya ang personnel didto,” matod ni Pono dihang nahinabi sa Superbalita Cebu niadtong Huwebes, Hunyo 6.
Sigon niini gipaninguha sa iyang mga sakop nga makaabot sa labing madali nga panahon sa lugar nga nasunogan aron mapugngan ang pagkatap sa kayo.
Niadtong Hunyo 1, 11 ka mga balay ang gilamoy sa kayo sa Barangay Guadalupe, Carcar diin giingong nagsugod ang sunog sa balay ni Teresita Barangan. (SCG)