ORMOC CITY, Leyte --Gibalik na sa dagat ang usa ka Hawksbill turtle nga napalgan sa usa ka mananagat.
Si Ormoc City Mayor Richard Gomez nangulo sa pagbuhi niini sa may Bagsakan Center, alas 9 sa buntag, Huwebes, Hunyo 6.
Ang maong babaye nga Hawksbill turtle nakit-an ni Admer Iliada Sr, sa baybayon sa Barangay Ipil ning dakbayan niadtong Mayo 30.
Gi turn-over sa mananagat ngadto sa Fisheries Division sa City Agriculture Office aron masusi ang kondisyon niini.
Matod sa taga Fisheries Division ang maong sea turtle anaa sa duha pa ka tuig ug naa sa upat ka kilo.
Gibutangan og marka sa taga Fisheries Division ang sea turtle sa una pa gibuhian pagmatuod nga gibalik kini sa dagat sa mga nakakuha.
Matod ni Gomez, gikinahanglan nga panalipdan ug ampingan ang ingon ani nga mga matang sa dagat aron kapugngan ang pagkahurot niini.
Gani iyang giawhag ang tanan residente sa Ormoc o bisan asang lugar nga mo report dayun sa awtoridad kung dunay makit-an nga sea turtle aron masusi ang kondisyon.
Daghan na nga mga sea turtle ang nidagsa sa kabaybayonan sa Ormoc ug luwas kini nga gibalik sa dagat.
Gawas sa sea turtle, duna usab sightings sa mga butanding sa Ormoc Bay.
Dugang sa mayor nga usa sa iyang tutokan nga pabiling protektado ang kalikupan batok sa mga mo guba niini.