Programa sa edukasyon gipaningkamutan nga mapatuman

ISIP tubag sa tawag sa kadaghanan nga mahatagan og maayong edukasyon ang mga kabataan sa barangay, mga opisyal sa Barangay Leon Garcia ning siyudad nanganti nga mobuhat og mas daghan pang lakang, pamaagi aron maangkon ang maong katuyuan.

Sa pagduaw sa Superbalita sa barangay, gitagsa-tagsa pagyagyag ni barangay kagawad Lita Empis ang mga programa, proyekto nila alang sa edukasyon.

"Naa nami mga plano karon sa barangay para sa mga batan-on dinhi, unta sa dili madugay ma-okey na gyud siya," ni Empis nga chair sa Committee on Education sa lugar.

Niya, nga sila sa barangay council uban ni barangay kapitan Rolando Cagay padayon sa paghuna-huna og pamaagi nga matubag ang panginahanglanon sa mga molupyo sa lugar, luyo sa igu-igo lamang nga badget, mga suliran nga di kalikayan.

Tungod sab sa paningkamot sa barangay, kapin gatus sab mga kabataan ang naka-benepisyo sa scholarship nga gihanyag sa barangay inubanan sab sa tabang sa mga lokal nga opisyal sa siyudad, daghan pa.

Karon naa mi 219 ka mga scholars sa high school, diha lang sila nag-eskwela sa high school diri sa barangay," ni Empis.

Apan luyo niini, magul-anon sab nga gisaysay sa barangay kagawad nga bisan sa ilang paningkamot, may pipila sab ka mga kabataan ilawom sa programa ang wa magtarong sa ilang pagtungha.

Aminado ang opisyal nga sakit gyud nila sa ulo ang pag drop-out sa pipila ka mga kabataan nga nahilakip sa scholarship.

"Daghan sab lagi ang nag drop-out, kana laging madala og barkada, unsa pa ng problema nila. Gina-istoryahan namo ang ginikanan aron magiyahan ilang anak, sayang man sab gud."

Bisan pa man og makawala og kadasig ang nahitabo, nangusog gihapon ang mga barangay opisyal sa Leon Garcia nga matuman ang gidamgong mabutangan og elementarya ang barangay.

Subay sa pahayag ni Empis nga ang maong school building i-plastar dapit sa seawall, gilauman nga masugdan na ang konstruksiyon niini sa dili madugay.

Usa sa nagpadayong kalihukan sa barangay mao ang pagpakaon sa mga kabatan-onan nga nanginahanglan og pagtagad ang kahimtang sa panglawas.

Batbat ni Empis nga nagahan-ay sila og panahon aron maduso ang maong programa.

Sumala niya nga luyo sa pagsiguro nga nakatungha ang mga kabatan-onan sa barangay, mahatagan sab sa saktong nutrisyon ang ilang lawas.

Gilantaw sab ni Empis ang posibilidad nga matudluan ang mga estudyante sa daycare pinaagi sa himuong tutorial session ngadto kanila.

Mapasalamaton sab ang barangay kagawad sa mga grupo, indibidwal nga padayong mihatag sa ilang suporta.

"Naay mga estudyante dinhi sa Holy Cross kanang sa NSTP nila, naga-anhi sila diri aron magtabang sa atua. Nagahimo sila og outreach activity sa mga taga dinhi. Dako na kaayo na nga tabang para sa amoa," sulti sa barangay kagawad.

Malaumon ang opisyal nga unsa mang paningkamot nga buhaton nila sa barangay, padayon sab nga mohatag sa ilang suporta ang mga katawhan sa lugar.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph