GIPATAAS sa Davao del Sur Provincial Police Office (DDSPPO) ang ilang alerto lukop sa lalawigan aron subling babagan ang hulga sa terorismo.

Human sa nahitabo sa dakbayan sa Davao diin dungang napalgan ang duha ka mga bomba sa managlahing lugar, gilantaw sa kapulisan nga usa kini ka diversionary tactics nga gipaluyohan sa mga teroristang grupo.

Bisan ang Digos City Police Office (DCPO) hugot sab ang pagbantay sa overland transport terminal aron masiguro ang seguridad sa mga pasahero.

Kahinumdoman nga nakit-an ang usa ka bomba sa kasilyas sa city hall ug ang usa gawas sa Central Bank didto sa Davao mao nga subling natay-og ang rehiyon bisan pa man og malampuson kining napahiyus sa kapulisan.

Si City Police Director Chief Inspector Anthony Padua nagmando sa kapulisan nga mohimo gyud og pagpatrolya sa mga pampublikong lugar, hugtan ang pagsita sa mga bagahe nga bitbit sa mga pasahero.

Taud-taod na unta nga daw nakalimtan sa katawhan ang nahitabong pagpamomba dinhi sa lalawigan diin nikutlo og ubay-ubay ka mga kinabuhi.

Apan karon subling nahimong igmat ang katawhan pinaagi sa pagbantay sa mga katingad-ang butang ug lihok sa mga di iladong tawo.

Kahinumdumang tulo ka mga pagpamomba ang nahitabo sa siyudad sa Digos gikan tuig 2006.

Marso 29, 2006, dihang gibombahan ang Weena Bus nga niangol og pito ka mga tawo.

Nasubli pa kini human gibombahan ang Davao Metro Shuttle Bus niadtong Hulyo 24, 2008, nga nipatay og 2 ka mga tawo, miangol og kapin 18.

Samtang nahitabo ang ikatulong pagpamomba, Septyembre 1, 2008, nga pito gyud ka mga tawo ang namatay, miangol og laing 30.

Dinhi sa lalawigan, apil ang lungsod sa Bansalan, Davao del Sur, nga nabombahan niadtong Hunyo 15, 2007 diin ang insidente nagbilin og kasakit sa mga pamilya sa 6 ka mga tawong namatay ug niangol sa laing siyam.

Wa na'y kompiyansa ang kapulisan sanglit di pa matumbok kinsa ang suspek sa pagbutang og bomba didto sa siyudad sa Davao.

Di buot si Police Senior Superintendent Ronald Dela Rosa, provincial police commander nga mahitabo kini sa probinsiya, mao nga istrikto ang iyang mando sa tanang hepe dinhi nga mangulo sa pagmentinar sa kahapsay ug kalinaw sa ilang tagsa-tagsa ka lugar. (Orlando B. Dinoy)