USA ka banana grower ang gibanhigan sa wa mailhing mga suspetsadong nakamotor samtang nagmaneho sa iyang sakyanan, didto sa may Purok 12, Barangay Cambanogoy, lungsod sa Asuncion, Davao del Norte, Biyernes sa buntag.

Giila ang biktima nga mao si Michael Noblefranca, 29, molupyo sa susamang dapit.

Sa report gikan Asuncion Municipal Police Station nasayran nga nahitabo ang pagpamusil pasado alas 8:30 sa buntag, didto sa lugar.

Nag-drive sa iyang sakyanan ang biktima dihang gisundan kini sa duha ka wa mailhing mga suspetsadong nakamotor ug sa way paglangan gipusil siya gamit ang kalibre .45 nga pistola ka-upat ka beses.

Ang biktima nakahiagum og mga samad pinusilan sa nagkadaiyang parte sa iyang kalawasan hinungdan sa iyang kamatayon.

Human sa pagpamusil ang mga suspek daling misibat padulong sa wa matinong lugar sakay sa usa ka motorsiklo.

Kapulisan sa lungsod sa Asuncion ang mihimo na karon og dugang imbestigasyon sa hitabo.

Gilusad na sab og man-hunt operation ang otoridad aron sa paggukod sa mga suspek.

Gituohan sab nga posibling bangi sa yuta ang motibo sa nahisgutang pagpamusil. (Marvin Pineda)