CENTRAL MINDANAO – Natibway ang kinabuhi sa usa ka pumpboat operator human gipusil didto sa siyudad sa Cotabato.

Kapulisan nag-ila sa biktima nga mao si Juwarri Onutan, 47, minyo ug molupyo sa Sultan Kudarat, Maguindanao Province.

Sa taho gikan Cotabato City Police Office, nasuta nga nahitabo ang insidente alas 10:00 sa buntag, Pebrero 26.

Subay sa imbestigasyon nga samtang naghulat og pasahero ang biktima sa Bagsakan Area sa Megamarket, kilid sa Rio Grande De Mindanao, kalit lamang siyang giduol sa duha ka wala mailhing suspek ug sa way daghang istorya gipusil siya gamit ang kalibre .45 nga pistola.

Patay on the spot si Onutan human malubngi og bala ang iyang ulo ug dughan.

Mga suspek abtik sab nga misibat paingon sa wala masayring direksiyon sakay sa usa ka motorsiklo.

Pahayag ni Zubaira, nga sa wala pa gipatay ang iyang bana may naka-away kini nga grupo nga nanag-iya sab og mga bangkang namasahero sa siyudad nga posibling dunay kalabutan sa hitabo.

Gipamahayag ni Cotabato City Police Director Senior Superintendent Willie Dangane nga may suspek na silang gisundan sa pagpatay sa pumpboat operator.

Gitutukan sab nila ang anggulo nga personal nga atraso, lakip na ang away sa mga namasaherong bangkang de motor sa dakbayan kilid sa Rio Grande De Mindanao nga maoy hinungdan sa hitabo. (Edgardo Fuerzas)