GIPAHAMTANGAN sa Department of Trade and Industry (DTI) Central Visayas ang 14 ka mga tindahan og notice of violation nga naninda og construction ug hardware materials sa Sugbo human napamatud-an nga dili kini certified ug substandard kini nga mga produkto.
Tungod sa Data Privacy Act dili makabutyag ang DTI 7 sa mga pangalan sa mga tindahan nga ilahang napahamtangan og NOV.
Aron masiguro nga luwas ang publiko batok niining mga depektoso nga materyales sa construction ug hardware, gipahugtan pa sa DTI 7 ang ilahang pagpanakop sa naninda niini.
Si DTI 7 director Asteria Caberte nga lakip sa ilahang nasakmit nga mga depektoso nga materyales mao ang girolyo nga steel bars, incandescent nga bombelya, PVC electrical tapes ug uban pa diin nagkantidad kini og P254,789.
Matod ni Caberte nga padayon ang ilahang monitoring ug pagpanakop lukop probinsiya sa Sugbo gikan sa Liloan ngadto sa Carmen sa amihanan ug sa Minglanilla ngadto sa San Fernando sa habagatan.
"DTI’s intensified monitoring and enforcement efforts include going after unscrupulous importers, traders, and retailers that disregard the Consumer Act and Product Standards Law," si Caberte nagkanayon.
Dugang niini nga aduna pa'y daghang mga dapit sa Central Visayas nga mapuno sa listahan karon tuiga diin nakigtambayayong na sila sa tagsa- tagsa ka mga regional ug provincial staff sa Consumer Protection Division.
Gipahimug-atan usab niini nga base sa Standards Law, kinahanglan nga certified ang materyales gikan sa importation, distribution ug offer for sale o manufacture sa Bureau of Product Standards (BPS).
Kinahanglan nga anaa kini'y identification ug product markings.
Gibutyag usab ni Caberte nga sagad sa mga retailers nga napahamtangan sa NOV nakalapas kini sa RA 4109 diin nagdili kini sa pagpamaligya sa depektoso nga materyales o kining wala'y klaro ang standard kalidad, grado, style ug model niini.
Sa pagkakaron gipaubos na sa pre-adjudication hearing ang mga retailers nga napamatud-an nga nakalapas sa balaod diin pamultahon usab kini og kantidad base na usab sa kalapasan niini.
Gidasig hinuon sa DTI 7 ang publiko nga i-report sa ilahang ahensiya kining mga substandard nga produkto nga ilahang mapamatud-an aron ilaha kining mapahamtangan og silot.
Subay niini ang Bureau of Fire Protection (BFP) Cebu Province nipahimangno usab sa publiko nga dili mogamit aning mga substandard nga electrical materials aron malikayan ning sunog.
"Electrical fire is one of the leading causes of residential fires. We are encouraging the public and retailers to purchase electronic and electrical items bearing Philippine Standard (PS) or Import Commodity Clearance (ICC) marking to ensure product quality and authenticity," matod ni Fire Supt. Fritzie Manatad, fire marshal sa Cebu Province.