GOOD day, kahigalaan! Kumusta ang atong mga kalawasan ug panudlanan? Sa mga naka-”payout” na, seguro ang inyong pitaka daw burota kay nagbaga ang milyones nga kuwarta ha ha! Init kaayo ang hisgutanang panguwarta ilabi na dinhi sa Davao del Norte nga among probinsiya. Ang nailhan nga “City of Palm” o “Tagumpay” nga siyudad sa Tagum, gitawag sa uban nga “City of Scam” tungod sa mga ningbutho nga “investment companies.”
Daghan sa akong mga kaila, nag-“PAY IN” o nagbutang og kuwarta sa nagkadaiyang investment nga kompaniya kay lagi mahimong triple hangtud sa unom (yes times 6) ka pilo ang ilang kuwarta inig “PAY OUT” sulod sa usa ka bulan. Dili ka ganahan nga ang imong usa ka libong ipundo mahimong sais mil, ang tres mil mahimong kinse mil, ang singkuwenta mil mahimong siyento saysiyenta sulod lamang sa usa ka bulan?
Nia pa pay bag-o, ang usa ka gatus nga investment nimo karong bulana, makuha nimong singkuwenta mil inig abot sa Disyembre. Kinsay dili makapangutang kung ingon ani ra kagamay ang puhonan? Kinsa poy dili ganahan niini? Tubag!
Bitaw, wala man seguroy tawo nga wala nangihanglan og kuwarta no? Dili pod kita makapanginabuhi og maayo kung hubas pirmi ang bulsa nato. Tungod niining uso nga panguwarta sa among dapit, daghang naapektohan ilabi na ang mga lending centers apil ang mga pawnshop, kahigalaan.
Lisud na man god mokuha’g kuwarta nga padala o magprenda kay natapok sa investment companies ang mga kuwarta - wa katuyok bah! Niapil ba ko? WALA. Naaghat o nag-discourage ba ko sa akong mga kaila? Sa uban nga close ra nako apan sa kadaghanan, wala gayud ko nakialam kay kanya-kanya baya kita’g diskarte sa panginabuhian.
Ngano wala ko niapil? Ang ahensiya mismo sa gobyerno ang nagkanayon nga “iligal” kuno kini. Ikaduha, tungod pod sa konbiksyon sa akong panghunahuna ug kasingkasing.
Sa tan-aw nako, gapus kini sa pagkahakog. Inig makakuha na ka sa kuwarta, walay rason nga moundang ka. Akong higala dili na kainom og kape kay “Pay In ug Pay Out” na lamang ang sige’g sulti. Apektado na ang tulog tungod sa kahinam nga moabot karong Disyembre ang bag-ong sakyanan.
Nahinumdoman nako sa dihang gitental ni satanas si Hesus (Mateo 4: 1-11) dili pinaagi sa kuwarta apan sa mga maayo ug gikinahanglan kaayong mga matang sama sa tinapay, proteksiyon ug tananag butang kung mosimba Siya kay satanas.
Apan gibadlong siya ni Hesus, ug siya ningpahawa.
Sa tan-aw nako, pitik-mingaw nga paagi sa yawa ang susamang pagpadatu o pagpadaghan sa kuwarta kung ang atong kinabuhi nasentro na lamang sa materyal nga butang, ug dili sa gingharian sa Diyos Amahan.
Wa ko nasuko ha, nagsulti ra pod ko sa akong gamay’ng nasabtan nga bisan libreng tangkong sa kadalanan, hapsay nga ginhawaan-mamahimo rang makalipay og dako kaayong pasalamatan sa Magbubuhat sa tanan. #happylang