DAVAO OCCIDENTAL -- Napatay sa usa ka nag-huramentadong pastor ang iyang 16-anyos nga anak ug laing duha ka silingan didto sa Barangay Marabatuan, lungsod sa Jose Abad Santos, alas 3:30 sa hapon, Huwebes, Hunyo 6.
Gibutyag ni Police Colonel Narciso Bayugo, police provincial director sa Davao Occidental nga gihinabi pinaagi sa iyang telepono, nga ang mga biktima mao si Analyn Laquina, 16, kauban niini nga si Rey John Munsag, 5, ug kasugat sa suspek nga si Olipio Oso, 55.
Namatay gilayon ang mga biktima human nahiagom og mga samad tinigbasan sa nagkadaiyang bahin sa lawas.
Matud ni Bayugo nga ang suspek nga giilang si Pastor Roger Laquina, 40, sakop sa tribung Manobo, kalit nag-amok gamit ang lagaraw.
Nahitabo kini human nakuwangan sa gipangayong “dore” sa iyang kaslunong anak nga si Analyn apan wa na gibutyag kinsa ang mahimong pamanhunon niini.
Si Bayugo nitataw nga daling nasikop ang suspek apan banda alas 2:20 sa kaadlawon, Biyernes, Hunyo 7, nihangyo kini nga dalhon sa duol nga Lachica District Hospital aron magpa-check-up kay nagsakit ang tiyan tungod sa iyang operasyon kaniadto.
“Dati na siyang may medical surgery so while being detained, he requested our policemen na dalhin siya sa ospital at pinagbigyan naman siya for humanitarian consideration,” asoy ni Bayogo.
Apan, paghidangat sa Barangay Caburan Small, mihangyo ang suspek nga mangihi ug didto nakahigayon kini nga mailog ang armas ni Patrolman Jeffrey Angeles kinsa gipusil niini sa likod.
Suwerteng wa maunsa si Angeles kay naka-bullet proof vest, asoy ni Bayogo.
Daling miresponde ang kaubang pulis nga si Senior Sergaent Edwin Mellejor ug gipusil ang suspek tumong sa lawas.
Gidala sab dayon sa kapulisan ang pastor ngadto sa tambalanan apan gideklarang dead on arrival sa mga nag-atimang doktor.
Samtang, gihaya na ang mga biktima sa ilang tagsa-taga ka panimalay.