LAB-AS pa sa panumdoman ang pagkamahiligon nila ni Gov. Junjun Davide ug Vice Gov. Agnes Magpale pagkiha sa ilang kaatbang sa politika. Nabaslan sa dihang si Rep. Gwen Garcia misang-at og kaso ngadto sa Ombudsman batok nila ni Davide, Magpale, Administrator Mark Tolentino, Human Resource Officer Bonifer Nacorda, Health Officer Rene Catan ug Budget Officer Danilo Rodas. Kalapasan sa Anti- Graft and Corrupt Practices Act, grave misconduct ug conduct prejudicial to the best interests of service.
Sa 2012 si Garcia ug mga sakop sa BAC gikasohan sa katukoran sa CICC. Nob. 11, 2015 ang Ombudsman nga tinudlo ni Pres. Noynoy Aquino kansang administrasyon maginukdanon mimando sa dismissal ni Garcia ug mga sakop sa BAC nga mga department heads. Nakalingkawas si Garcia gumikan sa Aguinaldo Doctrine human masublii sa 2007-2010. Sila nga mga sakop sa BAC midangop sa Court of Appeals. Apan bisan wala pa mapinalisar ang hukom sanglit pending ang apelasyon sa gihapon gideklarar ni Davide nga bakanti ang posisyon sa mga sakop sa BAC nga sila si Health Officer Cristina Giango nga gihulip si Catan ug Budget Officer Eme Gingoyon nga gihulip si Rodas. Ang pagkatudlo nila ni Catan ug Rodas giaprobahan sa provincial board nga si Magpale maoy presiding officer hinungdan nga naapil sa kasong illegal appointment.
Hulyo 2017 ang Court of Appeals mihukom nga ang mga sakop sa BAC guilty lamang sa simple misconduct sukwahi sa nahauna nga grave misconduct maong gisuspenso ra og tulo ka bulan unya gimandoan sa pagpabalik sa katungdanan. Bisan nasango sa maong hukom si Davide sa gihapon mitudlo nila ni Catan ug Rodas. Si Giango gihimong ultimo sa medical clinic unit samtang si Gingoyon wala gyod pabalika taliwala sa mga sulat nga iyang gipadangat ngadto ni Davide. Dinhi magasukad ang kaso nga gisang-at ni Garcia batok Davide, Magpale ug kaubanan ning maong matang sa pangabuso sa gahom.
Niining ulahi naabswelto sa kaso si Garcia. Ang Court of Appeals mismo ang miingon nga walay kuraspyon ang pagtukod sa CICC. Ang Commission on Audit (COA) mitaho nga gani mubo ang nagasto sa pagtukod ikomparar sa ilang estimate diin nakadaginot ang probinsya. Ang korte usab walay nakita nga sayop gani gimandoan ang kapitolyo nga bayran ang kontraktor.
Ang CICC mibutang sa Cebu ngadto sa international map isip bantayog o landmark sa lalawigan nga gilihian sa kalibotanong kalihokan. Labaw pa sa 30M pesos ang kita matag tuig panahon ni Garcia. Apan gipasagdan nila ni Davide ug Magpale nga madugta human pasipad-i niadtong linog ug bagyo. Ila pa gyod nga gibaligya sa Mandaue og 300M pesos nga migasto og dul-an sa 1B pesos. (csa_1156@ayahoo.com/09064648954)