PULIS nga nadestino na sa Police Regional Office sa Cordillera Administrative Region (CAR) ang gi ambush sa nagsakay og awto pasado alas 4 ganinang hapon sa National Highway, Barangay Anunang Norte, dakbayan sa Bogo.
Ang biktima giila nga si Police Lieutenant Marcelo Cometa Jr, 48 nga taga Barangay Binabag, siyudad sa Bogo.
Sa imbestigasyon sa Bogo City Police Station, nasuta nga gikan sa iyang balay ang biktimang pulis sakay sa iyang motorsiklo apan pag abot sa Barangay Anunang, kalit lang siya nga gitaparan og SUV dungan sa pagpusil kaniya.
Igo sa iyang tuong bukton si Cometa sa wala pa matino nga kalibre sa armas.
Tungod sa pagpamusil, na lamba si Cometa sa iyang gisakyang motor nga miresulta usab sa pagka samad sa iyang nawong.
Dali siya nga gidala sa Bogo City District Hospital ug anaa na sa luwas nga kahimtang.
Matod ni Police Lieutenant Colonel Emely Santos, ang hepe sa Bogo City Police Station, nga iyang nahinabi ang biktimang pulis sulod sa tambalanan apan wala matod pa kini madudahan kinsay nagpusil kaniya.
Usa sa ilang gisubay mao ang may kalabotan sa iyang trabaho sa dihang na destino pa siya sa Bogo City police Station.
"Naa siguroy nasuko ani niya katong iyang mga nadakpan sauna kay na assign man ni siya diri sa Bogo mga 2010-2011," matod ni Santos.
Nabalik si Cometa sa siyudad sa Bogo tungod kay aduna siyay mga hearing nga gitambongan sa korte apan wala masayri kung unsa nga mga kaso.