KUMON nga talan-awon kaniadto ang hulagway matag hapon human sa trabaho ang mga bana nga maghayon ug magpahayahay nga magtan-aw og salida sa telebisyon bitbit ang ilimnon o sigarilyo samtang sa kusina si misis nagkabuang na og dagan-dagan kay gidungan ang paghikay sa panihapon, pag-atiman sa mga naglaundok nga trabahoon lakip mga projects ug homeworks sa mga bata.
Kung tan-awon nimo si misis mura og kugita ang kamot kay dagha’g kasway para maharos og human ang tanang tulumanon ug mahapsay ang panimalay.
Tinuod, di ba? Kasagarang bana di motabang sa mga ginbuhaton sa balay kay macho baya ang dating unya tawgon pa lang og under de saya.
Only in the Philippines ra ni mahitabo kay sa ubang nasod bitaw sama sa America, patas baya ang pagbahig sa mga trabahoon sa balay gikan sa pagluto, hinlo, laba ug uban pa.
Matod ni Dr. Huang Wei Li sa Taiwan, dunay mga positibong epekto ug dakong matabang ngadto sa mga bana kung sila mo abag sa ilang mga asawa sa mga ginbuhaton sa balay kay ang matinabangon nga bana mas taas og emotional quotient (EQ), malipayon ug mas himsog ang panlawas.
Pananglitan, kung maghisgot og time management, kung ang bana motabang pag-asikaso sa mga bata o mo asistir ni misis sa mga ginbuhaton sa balay human sa trabaho nagpakita kini nga maayo mobahin og mobalansi sa iyang oras sa panginabuhi ug sa pamilya.
Kining mga bana nga andam ug tagana motabang sa ilang mga asawa mga emotionally intelligent kay kahibalo man sila modala sa ilang kaugalingon aron di maigo dayon sa stress. Maayo sab ni sila mo dala sa ilang mga emosyon kay makasabot man sila sa bation sa ilang pares kung subraan na sa kahago.
Mao sab ni rason nganong mas malipayon ug molungtad ang panag-ipon kay makapasamot man kini sa ka suod kung magtinabangay.
Gawas ini makapa-ugnat sab kini sa kusog ug makapa himsog kay ehersisyo man sab ni ang mga trabahoon sa balay unya makapalayo sab sa mga sakit-sakit kaysa magsegi og lingkod.