Editoryal: Kadtong sunog sa Carcar

MAGSILBI untang leksiyon ngadto sa ubang kabomberuhan kadtong sunog sa barangay Guadalupe, siyudad sa Carcar niadtong Hunyo 1 diin wa dayon makaresponde sa alarama ang Carcar City Fire Station.

Mas nauna pa gyud nga miabot sa fire scene ang kabomberuhan sa kasikbit nga dapit.

Tungod niini, nahimong sumsuman ug gibaha sa mga negatibong reaksiyon gikan sa publiko ug apil na ang pipila ka mga opisyal sa siyudad ang kapabilidad sa nahisgutang fire station.

Pero si Sr. Insp. Matt Reil Pono, ang fire marshal sa Carcar, daw og sa wa makadawat sa mga pagsaway ug alang kaniya dili makatarunganon nga sila ang basulon.

Kini tungod kay, matod niya, ang tulo ka mga fire truck pulos mga depektuso ug gani ang usa niini mag 38 ka tuig na.

Matod pa nga ang usa ka fire truck nga miresponde sa maong sunog nga miugdaw sa 11 ka mga balay napagngan samtang nagmaniobra kini sa tungason nga bahin sa Guadalupe.

Makasabot ta pamahayag ni Puno kay bisan kinsa pa siguro ang anaa sa ilang sitwasyon niadtong panahona dili gyud makaresponde og sayo.

Pero wa kini magpasabot nga luwas na siya sa iyang responsabilidad ug gani angayan siyang ipaubos sa imbestigasyon sa iyang mga labaw ug sa mga City officials.

Dili ba apil man na sa iyang trabaho ang pag-check up kon anaa ba sa saktong kondisyon ang ilang mga kahimanan?

Angay usab susihon kon napadangat ba niya ngadto sa ilang labaw ang problema sa ilang mga fire truck? Nangayo ug nipahibawo ba usab siya sa siyudad sa Carcar kalabot niini?

Kining mga butanga maoy angay masayran sa mga tawo kay dinhi matino ang mga kasaypanan ug sa samang higayon maghatag og leksiyon ngadto sa ubang mga kabomberohan.

Natural lang ang pagbasol kanila kay nabulyaso man ang ilang trabaho. Ang-ang man og kadtong laing fire station ang mahayan.