WA PA gihapon makab-ot ang hustisya sa pamilya ni kanhi Bien Unido, Bohol Mayor Gisela Bendong-Boniel human sa duha ka tuig sa iyang kamatayon.
Pabilin usab nga wa makit-i ang iyang lawas.
Gipahigayon sa Biyernes, Hunyo 7, ang paghandom sa iyang kamatayon ug pagkawala sa kadagatan sa Caubian islet, sakop sa Olango island, Lapu-Lapu City diin giingong gilabay ang iyang lawas sa lawod.
Usa ka prayer service, candle lighting ug floral offering ang gihimo sa mga kabanay nga gipangulohan ni Mikai Bendong.
Uban kanila ubang sa sakop sa pamilya inubanan sab sa suod nga higala sa namatay diha sa ilang gi-abangan nga pumpboat.
Sa labing unang higayon mitambong si Angela Leyson, higala ni Gisela, nga maoy katapusan nga iyang gikauban sa wa pa giingong gipusil patay ang biktima sa Dive Camp resort sa Bien Unido, Bohol.
Si Leyson gipaubos gihapon sa witness protection program sa Department of Justice.
Naglaom sab ang pamilya nga bisan tipik sa lawas ni Gisela ma-recover.
Ang lawas giingong gihagbong sa dagat human gipusil sa ulo, giputos sa pukot ug gipabug-atan og mga bato.
Nasagmuyo ang mga Bendong sa nagkamang nga dagan sa kaso.
“Frustrated gyud, all the evidences are lined up and they’re really taking their (habig sa depensa) time. I dont know why?,” saysay ni Leyson.
Samtang si Atty. Shelamar Abadia, assisstant city prosecutor Lapu-Lapu, nipasabot nga sa ilang bahin andam sila sa tanang higayon ilabi na sa kasong parricide batok kang Niño Rey.
Gipahibawo ni Abadia nga usa sa nakalangay sa kaso mao ang motion sa depensa sa pagpa-inhibit ni Regional Trial Court (RTC) Branch 54 Judge Ferdinand Collantes hinungdan nga gi-raffle ang kaso sa laing huwes.
Sa kasong kidnapping batok ni Boniel ug kaubanan nga gidungog sa Cebu City court, nagpadayon pa sab.