PATAY ang giilang badlongon sa ilang lugar human ni mapusili sa mga sakop sa Pardo Police Station sa dihang iyang gi-hostage ang iyang mga ig-agaw sulod sa ilang panimay Sa sitio Cabangkalan 2, Barangay Bulacao sa siyudad sa Sugbo alas 7:40, Biyernes sa gabii, Hunyo 7.
Ang suspek nga gituohang high sa illegal nga drugas giila nga si Benjie Dela Rosa hingkod ang pangidaron nga nag puyo ra usab sa maong lugar.
Matod ni Police Major Regino Maramag, ang hepe sa Pardo Police Station, nga unang gikaa-away sa suspek ang iyang ig-agaw nga si Steve Dela Rosa ug Ryan Gardavan sa walay igong hinungdan.
Gitionan matod pa silag armas niini ug gipugos sa pagpasulod sa balay dungan sa pag hulga nga pamusilon sila.
Ang uyoan sa suspek nga si Armando Dela Rosa dali nga mitaho sa kapulisan labot sa gihimo sa iyang pag-umangkon nga si Benjie.
Sa pag responde sa mga police nga gipangulohan ni Maramag ila pang nabati ang singgit sa suspek ngadto sa mga police nga nagbahad nga pamusilon kini kung moduol.
Misuway pa sa pag hangyo si Maramag sa suspek nga dili pasakitan ang iyang mga hostage apan gipa-buthan siya niini.
Dinhi na nahitabo ang pagpusil sa mga police sa gawas nga miresulta sa pagka igo ni Benjie.
Gitabang pa unta kini pinaagi sa pagdala sa tambalanan apan gi deklara kini sa mga doctor nga dead on arrival.
“gipasulod niya sa balay ang iyang mga ig-agaw nya iyang gihadlok nga iyang pusilon kung mo gawas sila mao to gi respondehan namo,” matod ni Maramag.
Giila ang maong suspek nga notado na sa ilang lugar sa Sitio Cabangkalan 2 gani niadtong Hulyo 2014 nabilanggo na kini sa kasong attempted murder ug nakagawas human ma dismiss ang kaso niadtong Enero 2016.
Daghan na ang mga reklamo nga nadawat ang Pardo Police Station sa mga silingan niini nga manion og armas nga maoy hinungdan nga mangahadlok sila niini.
Tulo ka mga armas nga nakuha sa kapulisan gikan sa posisyon sa suspek kini mao ang .357, .22 ug calibre 45 nga maoy gigamit sa pag hostage sa iyang mga ig-agaw. (AYB)