DUHA ka mga tawo ang gipatay sa managlahing insidente sa dakbayan sa Mandaue, Biyernes sa gabii, Hunyo 7, ug Sabado sa kaadlawon, Hunyo 8.
Usa ka 27 anyos nga giilang si Dale Abayon, taga may dalan P. Remedio sa Sitio Tilapyahan, Barangay Banilad ang giluba samtang natulog pasado alas 10 sa gabii niadtong Biyernes.
Ang suspetsado naila nga si Larry Suplag, 34 anyos, nga nagpuyo sad sa maong barangay.
Si Suplag ang boluntaryo nga nitahan sa iyang kaugalingon sa Subangdaku Police Station, Sabado alas 6:30 sa buntag, Hunyo 8.
Matud ni Police Colonel Julian Entoma, ang director sa Mandaue City Police Office (MCPO), nga base sa pamahayag sa suspetsados nga samtang natulog ang biktima sulod sa tricycle, nga nahimutang usab diha ra sa may basketball court sa maong lugar.
Giingon nga niduol si Suplag sa biktima dala ang usa ka kutsilyo dayon dunggab sa biktima sa liog sa biktima makadaghang higayon, hinungdan sa hinanaling kamatayon.
Gitan-aw karon nga adunay daan na nga kasungian ang duha.
Samtang usa ka Alexander Sungahid, hingkud ang panuigon ug taga Barangay Opao, ang patay diha- diha dayon human pusila sa duha ka lalaki nga naka-motorsiklo.
Giingon nga nagkaon og noodles daplin sa usa ka stall daplin sa dalan G. Ouano sa maong barangay, pasado alas 3 sa kaadlawon pag Sabado, Hunyo 8.
Ang mga suspetsado, nga giingon naka-bonnet, daling niikyas human sa pagpamusil.
Usa sa gitan-aw nga motibo sa maong pagpamusil may kalambigitan sa drugas human napamatuod ni Entoma nga si Sungahid anaa sa drug watchlist sa Opao Police Station.
Gipalawman pa hinuon ang inbestigasyon sa uban pa nga motibo sa pagpatay. (FMD)