Mga duwa karon Hunyo 09, 2019
4:30 pm- Meralco batok Alaska
6:45 pm- Phoenix batok Rain or Shine
BUAKON sa Alaska Aces ug Meralco Bolts ang ilang panagtabla sa ilang panag-abot sa premirong duwa karong hapon sa Philippine Basketball Association (PBA) Commissioner’s Cup sa Ynares Center sa Antipolo City.
Ang Aces ug Bolts kasamtangang nagbahin sa ikaupat nga luna nga pulos naggunit og 3-2 nga rekord.
Pareha man tuod sila og rekord apan mas gilaumang mas taas ang moral sa Aces gumikan kay gikan kini sa impresibong kadaugan batok sa Magnolia Ang Pambansang Manok, 103-80.
Apan alang kang Aces coach Alex Compton, dili kini angayang sumbanan kabahin sa ilang puwersa ug kinahanglan nilang mas mokayod pa.
“We caught them tired... and kinda with a lack of preparation,” pasabot ni Compton kabahin sa ilang dakong kadaugan sa Hotshots.
“I know what that’s like, from the finals we’ve been in before. So, with the quick turnaround you don’t see another team’s best - when they’re coming off the finals - in their first game.”
Ang Hotshots gikan sa kapakyasan sa miaging Philippine Cup finals batok sa San Miguel Beermen.
Si Meralco coach Norman Black nasayod nga dili sayon ang pagbuntog sa Aces ug kinahanglan nilang ipagawas ang tanan nilang makaya ning sangkaa.
“It will be a tough matchup with Alaska,” asoy ni Black.
Sa main game, magsangka ang Phoenix Pulse Fuel Masters batok Rain or Shine Elasto Painters nga pulos adunay 1-2 nga rekord. (ESL)