PILA na lang sab kapamilok ug masaksihan na sab nato ang makalingaw ug mabulukong selebrasyon sa Kadayawan Festival sa Davao City.
Usa sa highlight dinhi mao ang Hiyas sa Kadayawan 2019.
Sa nagkaduol nga kalingawan, subling nanawagan og partisipante ang mga organizers sa aktibidad.
Mga moapil sa Hiyas naglangkub sa 11 ka tribu sa Davao City nga mao ang Obu Manuvu, Bagobo-K’lata, Matigsalug, Iranun, Bagobo-Tagabawam Ata, Kagan, Sama, Tausug, Maranao ug Maguindanao.
Subay sa giya nga gipaguwa sa City Government of Davao, ang representante sa matag tribu angay i-endorso sa komunidad.
Ang representante 18-anyos, single ug wa naminyo, residente sa Davao og tulo ka tuig.
Dugang pa nga ang submission sa official entry ug ubang rekisitos karong Hunyo 19, 2019, Biyernes, 4PM sa City Tourism Operations Office sa Pasalubong Center Building, Palma Gil Street ning siyudad sa Davao.
Mga kandidata, hukman base sa mosunod nga criteria, Knowledge of her Culture (30%), Cultural Skill o Talent (25%), Personality and Bearing (25%), Community Project Proposal (10%), Deportment (10%).
Laing pag-grado sab ang himuon sa closed-door interview ug presentasyon sa project proposal.
Subay sa iskedyul ang presentasyon sa mga Hiyas sa Kadayawan candidata, himuon sa Magsaysay Park, Agosto 2, 6PM human sa Pag-abli sa Kadayawan.
Ang palarong Hiyas sa Kadayawan Finalist modawat sa mosunod nga premyo: Hiyas sa Kadayawan (P100,000); Hiyas sa Panaghiusa (P80,000); Hiyas sa Kalambuan (P60,000); walo ka Hiyas sa Kaliwatan (P20,000) matag usa ug ang Best in Cultural Presentation modawat sab sa P10,000.
Sa dugang detalye mamahimong manawag sa Davao City Tourism Operations Office sa (082) 222-1856 ngadto 58 o mag-email sa davaocitytourismevents@gmail.com.