DILI madawat sa usa ka negusyante sa palengke sa Bankerohan Davao City ugaling dili siya maka-“pay out” sa iyang na-invest nga P20,000 sa usa sa mga iladong money investment schemes karon sa rehiyon.
Sumala ni Rosalie Roble, negusyante og gulay sa Bankerohan Public Market nga dili gyud siya mosugot, apan kung ang Presidente na sa nasud ang magmando nga ipasira ang mga investment schemes, butang kuno nga wala na siyay mahimo niini.
“Dili man gyud ta kadawat kung kini ang mahitabo, pero kung si President Duterte na ang mopasira, buot ingnon, modagan na sab tong mga tag-iya aning investment schemes, dili na gyud nato makuha, pero mintras wala, ug wala naapil sa gi-mention ni president, malaumon gihapon ta nga naay pay out,” saysay ni Rosalie Sabado sa buntag, Hunyo 8.
Uyon sab ang usa ka traysikad drayber nga ipasirado na kini aron dili na unya daghan ang mabiktima.
“Husto ni, kay ngano man, ang mga tawo ron halos didto na tanan ang ilang mga kuwarta, luoy og mabiktima ang kinadaghanan, mao nang mintras sayo pa, undangon na,” ingon ni Fredo Navalles, 50-anyos, traysikad drayber sa Barangay 31-D, Poblacion, ning siyudad.
Samtang sa probinsiya sa Davao del Sur, hilabihan ang gibating kaguol ni Bernard (apilyedo gitago), 42, taga Matanao human masayod sa mando sa presidente.
Nabalaka ug naguol sab si Lolita, 32, molupyo sa lugar, human sa miaging adlaw lang siya nibutang og P50 mil sa maong organisasyon.
Apil sa nabalaka si Remegios, 43, kinsa kawani sa gobyerno human bag-o lang siya nibutang og kantidad P100,000 ngadto sa Kapa.
Una niini, nanggawas kagahapon sa social media ang interview sa Sonshine Media Network International (SMNI) pinaagi ni Pastor Apollo Quiboloy kang President Rodrigo Duterte.
Gibutyag ni Duterte nga iyang gimandoan ang National Bureau of Investigation (NBI) ug ang Criminal Investigation and Detection Group (CIDG) nga paimbestigahan ug ipasirado ang usa ka iladong money investment scheme.
Dugang sa presidente nga lakip na niini nga ipasubay ang daghang nanggawas karon nga mga money investment schemes ug pintok niini nga gisulti nga kini usa ka pagpangilad sa katawhan.
Sa miaging bulan, si Interior Secretary Eduardo Año nagmando sa kapulisan ug mga opisyal sa gobyerno nga sirad-an ang Kapa una moabot ang eleksiyon apan wa gipatuman sa mga mayor ug gobernador. (Jeepy P. Compio ug Orlando B. Dinoy)