Nalzaro: Alcover gusto lang manguwarta?

ADUNAY mga akusasyon nga kining pagsaba-saba ug sige pangataki ni pilderong Konsihal Pastor Alcover Jr., batok sa iyang kauban sa partidong Barug PDP Laban, Councilor-elect Nina Mabatid gumikan kay gusto manguwarta ang konsehal kang Mabatid. Adunay akusasyon nga gusto lang magpa-refund si Alcover kang Mabatid sa iyang gasto sa eleksiyon. Kay naghatagan naman niya si Mabatid og kuwarta niadtong kampanya.

Gi-deposituhan siya ni Mabatid og P24,000 sa iyang bank account sa BPI. Adunay ebidensiya nga bank deposit.Wala mo-eksplikar si Alcover kabahin ani. Gihatagan pa siya og P300,000 para sa pagkaon unta sa mga habal-habal drivers sa bukid nga naghimo og caravan para ni Niña. Gi-ingnan siya ni Nina nga mag-ihaw og mga baboy pero pansit ray nadala sa grupo ni Alcover. Asa man ang kuwarta? Aw, asa pa, di gibulsa.

Nangakusar si Alcover ni Mabatid nga gi-junk siya og ang ilang mga kaubanan sa partido. Pero dia koy lista sa mga barangay ug ranking ni Alcover nga puro nangiwit. Wala man gani siya mo-number one sa Sambag Uno ug Agsungot nga mao kuno ang iyang balwarte. Nagduwa lang si Alcover sa 13th ug 14th slot. So, kon atong isumada ang resulta diha ra gyud siyang dapita. Mao gyud ang final result nga ika-13 siya.

Talamban (14th); Sto. Nino (12th): Adlaon (2nd pero pila ray botante); Agsungot (6th); Apas (13th); Bacayan (12th); Banilad (13th); Binaliw (7th); Budlaan (5th); Busay (11th); Cambinocot (5th); Capitol Site (13th); Carreta (13th); Cogon Ramos (12th); Day-as (13th); Ermita (11th); Guba (8th); Hipodromo (12th); Kalubihan (15th); Kamagayan (9th); Kamputhaw (12th) Kasambagan (12th); Lahug (13th); Lorega (7th); Lusaran (14th); Barrio Luz (11th); Mabino (10th); Mabolo (14th); Malubog (9th); Pahina Central (13th) Parian (10th); Paril (4th); Pit-os (10th); Pulang-Bato (7th). Kuwang pa ni og 12 ka barangay nga pareha ra gihapon ang iyang standing/ranking.

Reklamo siyang gi-junked ni Niña sa Mabolo ug gipangayoan siya og campaign funds. Kon gi-junked siya dili lang sa Mabolo kon dili sa tanang mga barangay kay nangiwit man siya. Natural mogasto gyud ka kon kandidato ka. Unsa may gusto niya librihon? Patuga-tuga siyag lansar unya way kuwarta. (bobbygnalzaro@gmail.com)