NAAY nagsigig duso karon nga pasirad-an ang pribadong Material Recovery Facility (MRF) ug ang engineered sanitary landfill diha sa Barangay Binaliw. Apan wa silay gitumbok nga mga alternatibo kon molampos sila sa ilang tinguha.
Mao kini ang dakong pangutana nga wala matubag sa atong higala nga si Ramil Ayuman, kanhi kapitan sa Barangay Apas, sa iyang pag-awhag sa pipila nga mopetisyon alang sa pagpasirado sa maong pasilidad.
Wala ko motingog dayon kabahin sa maong isyu kay naghulat ko mohisgot si Ramil, nga bag-o lang sab napakyas sa iyang tinguha nga mahimong konsehal.
Kon molampos karong adlawa ang tuyo nga pasirad-an ang maong pasilidad, asa man ilabay ang mga basura sa Syudad sa Sugbo, sa Syudad sa Mandaue, ug lungsod sa Consolacion?
Nakapanguta kita niini kay dihang dunay aksidente sa Consolacion dumpsite ug napasirad-an kini sa miaging bulan, ang basura nga adto unta ilabay matag adlaw, gidawat diha sa pribadong pasilidad sa Binaliw.
Unsa kaha kon nagpakabuta-bungol na lang ang tagdumala sa maong pasilidad? Unsa kaha kon naghunahuna sila nga maayong-laki ra ba kini si Ayuman ug dunay pipila ka konsehal ug mga residente sa Binaliw, lakip na sa silingang mga barangay ang moduyog kaniya.
Di ba magpasad na unta karon ang mga basura sa tibuok Metro Cebu? Di ba manimaho na ang Metro Cebu?
Ambot kon napangutana ba kini sa nahitabong closed-door technical conference tali sa Environmental Management Bureau (EMB) ug sa tagdumala sa mang MRF ug sanitary landfill. Diha man gud unta ang pipila ka mga lider sa giingong nagpetisyon.
Usa kanila mao ang konsehala sa Binaliw nga dunay gipanag-iyang lote duol sa maong pasilidad dayon gusto siyang ibaligya kining maong lote.
Kahibud-ngan lang sab nganong moingon kining nagpetisyon batok sa Binaliw facility nga nanimaho na, baga kaayo ang mga langaw, ug daghan ang nangasakit diha sa maong barangay.
Tanang mga news reports nga nahimo sa mga reporter nga nakabisita sa maong pasilidad niingon nga layo ra kaayo ang baho ug ang kadaghanon sa langaw diha sa Binaliw kon itandi kaniadto sa Inayawan dumpsite nga nasirad-an na.
Dayon, gitaho sa Sun.Star Cebu nga wa diay mosaka ang kadaghanon sa mga nangasakit sa dapit, matod pa sa barangay kapitan.
Apan nahibulong gyud ko nga padayong gibalik-balik ni higalang Ramil Ayuman ang iyang mga alegasyon. Kamatuoran ug kaayuhan sa Sugbo kaha ang tuyo sa atong higala niining iyang pagpangugat?
Kon tarungon nato og pinsar bay, di man kining mga nagpasiugda sa protesta ang moguwa nga hero. Ang Binaliw MRF and Engineered Sanitary Landfill man ang moguwa nga hero.
Sila man ang nakaluwas karon sa Metro Cebu nga dili manimaho human sa aksidente sa Consolacion dumpsite. Manimaho gyud unta ang metro kon wala pa ang pasilidad sa Binaliw.
@anol_cebu sa Twitter