BUHATAN sa kontrobersyal nga Kapa- Community Ministry International, Kabus Padatuon sa Barangay Poblacion, lungsod sa Compostela probinsya sa Sugbo giingong gisunog ala 1:45 Sabado sa kaadlawon, Hunyo 8.
Giingong gituyo sa pagsunog ang buhatan sa di momenos 10 ka wa mailhing mga tawo.
Gikataho nga gidala pa ang usa ka vault nga dunay sud nga dakong kantidad sa salapi.
Matod ni SFO1 Gina Labay, chief investigator sa Bureau of Fire Protection (BFP) sa lungsod sa Compostela nga nahinabi sa sibyaanang DyMF Bombo Radyo Cebu, usa ka Edward Dagatan nipahibawo kanila nga adunay sunog sa Barangay Poblacion.
Sa ilang pag-abot dako na kaayo ang kayo sa duha ka buildings. Giingong nagsugod ang kayo sa ikaduhang andana sa building ug dali ni nga nikatap sa ubos.
Aduna silay nakita nga mga galon sa luyo sa building nga gituohan nga maoy gisudlan sa gasolina nga gigamit sa pagsunog.
Ang giingong mga nagpuyo sa building nangreklamo nga gipangkuha sa mga suspek ang ilang mga cellular phones, lakip na ang vault sa ilang opisina nga adunay sud nga dakong kantidad sa salapi.
“On going pa ang imbestigasyon kay ang ingon nila arson with robbery kay naa may container sa luyo sa building ug gipangkuha daw ang ilang mga cellphones,” matod ni Labay sa samang interview.
Si Police Captain Ian Macatangay, hepe sa Compostela Police Station, nibutyag sa Superbalita Cebu nga nagpadayon pa sila sa ilang imbestigasyon ilabi na nga adunay pasangil nga gituyo sa pagsunog ang building sa Kapa.
Ipatawag pa nila ang 21 ka tenants ug in house nga magsilbing saksi aron masayran giunsa sa mga suspek pagsunog.
“Ang ilang allegation nga gipanguhaan daw silag gamit mao nang ato pa ning klarohon,” matod ni Macatangay.
Nakapangalan, matod pa, ang duha ka buildings ni Christopher Abad, giingong usa sa mga opisyal sa Kapa sa Sugbo.
CEASE AND DESIST
Giisyuhan na og cease and desist order sa lokal nga kagamhanan sa lungsod sa Compostela ang Kapa-Community Ministry International Inc. sa ikaduhang semana sa Mayo gumikan kay nag-operate nga way mayor’s permit.
Si Mayor Joel Quiño nga maoy nipirma sa CDO, ang personal nga nihatod sa kopya ngadto sa buhatan sa Kapa sa Barangay Poblacion sa lungsod.
Pag-abot niya sa buhatan, way opisyal sa Kapa ang niatubang.
Inay tahuron ang giisyu nga CDO, wa kini tumana sa mga opisyal ug padayon nga nag-operate sa ilang lungsod.
Nainsulto usab si Quiño kay wa giila sa pipila ka mga tawo sa buhatan sa Kapa ang iyang gahom dihang gilangkat niini ang tarpaulin nga iyang gipapilit sa gate dihang gi-serve niya ang kopya sa CDO.
“Pagbutang nako sa tarpaulin didto, murag ang ilang action may pagka arrogante kay gilangkat man gyud nila ang akong tarpaulin nga gibutang sa gawas sa gate.Nagmagahi. Wala ko respetuhi nga ila gyud gipakita ba nga walay bisan kinsa nga mopakgang sa ilang gipangbuhatan kanang mga higayona ba hangtod kagahapon (Biyernes, Hunyo 7) kay nag-continue man gyud sila,” dugang ni Quiño.
Tungod niini, nagtinguha ang mayor nga mapasakaan og tukmang kaso ang mga opisyal sa Kapa nga nagmagahi pagtuman sa CDO nga iyang giisyu.
“Gi-refer na nako sa legal kon unsay legal nga mga pamaagi nga machargean sila nga wala mohatag og importansiya sa giisyu nga CDO,” dason ni Quiño.
Nangayo usab siya og tabang kang Police Regional Office (PRO) 7 Director Debold Sinas aron mapakgang ang Kapa sa pag-operate sa ilang lungsod.
PASIRHAN
Si Presidente Rodrigo Duterte sa interview sa usa ka TV network sa Siyudad sa Davao niadtong Biyernes sa gabii, nimando sa National Bureau of Investigation ug Criminal Investigation and Detection Group pagpasira sa Kapa kay alang niya usa ka matang sa pagpangilad.
“Biro mo yung P100,000 mo would earn P30,000 a month. Ni Bangko Sentral, 3 porsiento lang annually ha. Maski yung bank of America can’t afford to pay P30,000 every month for your P100,000. Ang problema just like the Legacy at the end of the day yung walang makuha, you are into syndicated estafa.That is why NBI sirahan mo na sila upon my order,”matod ni Duterte. (AYB & SCG)