GIUNAY pagdakop sa Pardo Police Station ang pulis nga sakop sa Drug Enforcement Unit (DEU) sa Labangon Police Station 10 atol sa buy bust operation pasado alas 6 sa Biyernes sa gabii, Hunyo 7, sa Caimito street, Barangay Basak Pardo, Siyudad sa Sugbo.
Ang nasikop giila nga si Police Corporal Rogelio R. Atillo, kinsa nahibaw-an nang tig-recycle sa ilang nasakmit nga shabu.
Nakuha gikan kaniya ang usa ka paketeng shabu nga motimbang og 15 gramos, lakip na ang iyang Glock 17 nga service firearm ug P27,000 nga marked money sa buy bust operation.
Atol sa pag-imbestigar kang Atillo sa mga sakop sa Pardo Police Station, siya niangkon nga sa miaging buwan, nakabaligya siyag 15 gramos sa gituohang shabu.
Ang iyang hepe, Police Major Keith Allen Andaya, nitug-an nga kapin sa usa ka buwan na nila nga gi monitor si Atillo human sila makadawat og impormasyon nga mamaligya kinig illegal nga drugas gikan sa ilang nasakmit sa anti-drug operations.
Matod ni Andaya nga si Atillo mo-recycle sa drugas nga iyang makuha sa mga drug player nga madakpan.
“Gipanid-an nato daan sa iyang mga aksyon at that time. Wala lang gyuy igong concrete evidence. Naa na mi mga reports regarding ato. Then wala lang sa namo biglaa nga i-relieve sa iyang position sa DEU kay amo na siyang dakpon gyud,”matod ni Andaya.
Sa miaging adlaw, nakadakop ang Pardo Police Station og usa ka drug pusher.
Sa dihang giimbestigar, iyang gitudlo si Atillo nga maoy mo-supply kaniyag illegal nga drugas.
Dali nga nakig coordinate ang Pardo Police Station kang Andaya alang sa buy bust operation.
“Under observation nana siya pagka human na confirm namo sa dakop sa Pardo kay naa man silay nadakpan nga ang gahatag kining pulis. Mao to ni-coordinate sa atoa ang Pardo nga gituro siya nga siya ang source,” dugang ni Andaya.
GIPUSIL
Pulis nga nadestino na sa Police Regional Office Cordillera gipusil sa nagsakay og awto pasado alas 4 hapon sa Biyernes, Hunyo 7, sa national highway sa Barangay Anunang Norte, Dakbayan sa Bogo.
Ang biktima giila nga si Police Lieutenant Marcelo Cometa Jr., 48, taga Barangay Binabag, Siyudad sa Bogo.
Sa imbestigasyon sa Bogo City Police station, nasuta nga gikan sa iyang balay si Cometa.
Sakay siya sa iyang motorsiklo ug pag-abot sa Barangay Anunang, kalit lang siya nga gituparan og sports utility vehicle (SUV) dungan sa pagpusil kaniya sa sakay.
Naigo sa iyang tuong bukton si Cometa sa wa pa matino nga kalibre sa armas.
Nalamba siya nga niresulta usab sa pagkasamad sa iyang nawong.
Dali siya nga gidala sa district hospital sa Bogo City ug anaa na sa luwas nga kahimtang.
Matod ni Police Lieutenant Colonel Emely Santos, hepe sa Bogo City Police Station nga iyang nahinabi si Cometa sulod sa tambalanan. Way nahibaw-ang hulga si Cometa.
Usa sa ilang gisubay mao ang may kalabotan sa iyang trabaho sa dihang na destino pa siya sa Bogo City police station.
“Ang among duda work related. Naa siguroy nasuko ani niya katong iyang mga nadakpan sa una kay na-assign man ni siya diri sa Bogo mga 2010-2011,” matod ni Santos.