KAGAMHANAN sa Dakbayan sa Carcar nisaad nga mangita og paagi nga makapalit og bag-ong firetruck human nitumaw nga gubaon na ang mga sakyanan sa bombero sa siyudad.
Si outgoing Bise Mayor Mario Patricio Barcenas niingon nga mananghid sila sa Commission on Audit (COA) kon mahimo ba nila makuhaan ang ilang calamity fund aron pagpalit og usa ka firetruck sanglit maisip usab nga kalamidad ang sunog.
Apan gipasalig ni Vice Mayor-elect ug outgoing Mayor Nicepuro Apura nga pangitaan nila og paagi nga makapalit sila og bag-ong firetruck karong tuiga.
Ang mohulip kang Apura mao ang iyang asawa nga si Mayor-elect Mercedita Apura.
Ang maayo nga klase sa bag-ong firetruck nagkantidad og P17 milyunes.
Niadtong Hunyo 1, 11 ka mga balay ang gilamoy sa kayo sa Barangay Guadalupe, Carcar diin giingong nagsugod ang sunog sa balay ni Teresita Barangan.
Apan nireklamo ang mga opisyal sa barangay sa Konseho sa Siyudad nga niabot og dul-an usa ka oras una pa naabot ang mga bombero hinungdan nikatap na ang kayo sa kasikbit nga mga balay.
Tungod niini, gipatawag sa session sa konseho si Sr. Inspector Matt Reil Pono, fire marshal sa Dakbayan sa Carcar, niadtong Martes, Hunyo 4, ug gipatubag sa reklamo ug nihatag na usab sa status sa kahimtang sa tulo ka mga firetruck.
Si Pono nipasabot nga ilang nadawat ang alarma alas 4:14 sa hapon ug pagka alas 4:30 sa hapon, naabot na ang ilang firetruck sa dapit nasunogan nga 7.5 ka kilometros ang gilay-on gikan sa fire station.
Siya niasoy samtang nagpaingon ang E-141 firetruck (SBV-834) sa Barangay Guadalupe, napawong ang makina niini gumikan kay tungason ug kasagaran likolikuon usab ang again sa dili pa maabot sa lugar nasunogan.
Matod ni SFO1 Iyreen Coyoca, deputy fire marshal sa Carcar, nagpangidaron na og 38 ka tuig ang E-141 nga firetruck hinungdan nga kapila na kini makaagi og major repair.
“Kahibalo man na sila unsay sitwasyon sa trucks. Subject for replacement na gyud. Delikado sa drayber ug risgo sa mga crew,” pahayag ni Coyoca.
Si FO3 Romeo Urgel, chief of operations sa Carcar Fire Station, depektuso na usab ang laing duha ka firetrucks, ang E-143 (SKZ 909) nga hinatag sa kagamhanan sa siyudad sa Carcar ug E-142 (SHS 637) nga gidonar sa Kapitolyo panahon sa kanhi administrasyon ni Governor-elect Gwen Garcia.
Siya nidugang nga dili na makapakusog og dagan sa mga firetrucks labi na kon layo ang distansya kay mag-overheat dayon kini.
Sumala ni Coyoca ug Urgel ang E-142 kay gamiton na lang sa paghakot og tubig.
Si Pono nidugang nga maka-demoralize sa ilaha mga bombero ang pagmahay nila sa nahitabong sunog, apan sumala niini dili sila angay maapektuhan kay ilaha kining trabaho. (SCG)