MIABOT lang og P20,500 ang nagasto ni reelected Provincial Board Member Horacio Paul Franco sa iyang subli nga pagdagan sa ikaupat nga distrito sa lalawigan sa Sugbo sa miaging piniliay niadtong Mayo 13.
Sa gisumitir nga Statement of Contributions and Expenditures (Soce) niadtong Huwebes, Hunyo 6 sa Office of the Provincial Election Supervisor (OPES), nasayran nga nakagasto si Franco og P7,500 sa pagpaimprinta og campaign materials.
Nibayad usab siya og tag P4,000 sa matag usa alang sa iyang duha ka campaigner.
Samtang, P5,000 ang iyang nagasto sa pagbiyahe sa pagpangampanya sa ikaupat nga distrito.
Ubos sa Section 13 sa Republic Act 7166 kun Synchronized National and Local Elections Law, ang usa ka lokal nga kandidato nga sama ni Franco gilimitahan sa P3 nga gasto sa matag botante nga dunay partido. Kon independente nga kandidato kay P5, samtang P5 sa mga political party.
Ang ikaupat nga distrito adunay kinatibuk-ang 323,278 ka mga botante ang narehistro sa Commission on Elections.
Kon ang RA 7166 ang basehan, si Franco mahimo makagasto hangtod sa P969,834 kun ang sumada i-multiply ang gidaghanon sa mga botante sa tag P3 ang usa. (SCG)