ITAY nabiit...napan sadiay Camp Teodulfo Bautista Station Hospital sadiay Jolo ni Pres. Rodrigo Duterte. Misyon: personal nga inyawatna ti karbengan a pannakabigbig dagiti nasugatan a soldado a nakirupak kadagiti Abu Sayyaf sadiay Jolo, Sulu. Maipalagip nga itay kallabes, mano a soldado ti naipatli wenno pimmusay iti enkuwentroda kadagitoy a bandido ken terrorista nupay adda met dagiti napapatay kadakuada.
Sangapulo ket maysa a soldado ti nasugatan iti kaudian nga enkuwentro sadiay Sulu. Ket iti dayta a ibibisita ni Pres. Duterte iti ayanda nga ospital...binigbig ti presidente ti nagappuanan da Brig. Gen. Divino Rey Pabayo ti Joint Task Force Sulu ken ni Brig. Gen. Andres Centino ti AFP operations. Immawat dagiti nasugatan a soldado iti medalya a kas pannakabigbig iti kinaturedda iti rinnupak idi Mayo 31 sadiay Barangay Pansul, Patikul, Sulu. Dita nga imparikna ni Pres. Duterte ti madadaan a suporta ken panagtamed ti Duterte Administration kadagiti kameng ti AFP kas tekken ken saripda kontra terorismo iti lumaud. Nakuna ngarud ni Pres. Duterte: “Sa panahon na kailangan ninyo ang inyong commander-in-chief to be with you, beside you, and to die with you, nandito ako sa mga panahon na yan”...WOW!
***
Dayta ti kaudian nga eksena panggep iti kampanya ti gobyerno kontra kadagiti terorista a kas kadagiti Abu Sayyaf. Saludsod: apay nga agpapan ita...agrarraira pay laeng daytoy a grupo iti laksid ti pigsa ti puwersa ti AFP ken PNP? Apay a dida agamak a makirinnupak iti mas dakdakkel a puwersa? Adun nga enkuwentro ti napasamak kadagiti naglabas a panawen. Adun ti natay a kameng ti otoridad. Adu metten ti napursing kadakuada. Ngem apay a kasla saan a makmaksayan ti puwersada? Apay nga agtultuloy ti inda isasaranget iti likud iti kinabassiten ti bilangda no ikumparatayo iti bilang ti AFP wenno militar? Ngem ala, sungbatantayo amin dagita a saludsod...ngem intay man biit pasadaan dagiti sangabassit a paspasamak itay kallabes:
***
Unaentayo man biit panggep iti sports: no manarimaan ti pustaan iti laban dagiti teams iti NBA...namantsaan met ti imahe ti PBA gapu iti pannakakastigo ti star player ti Phoenix a ni Calvin Abueva. Namulta daytoy iti P70K ken napatawan iti indefinite suspension manipud ita nga aldaw gapu kadagiti di maiparbeng kano nga inaramid ken ugalina. Tsk tsk. Ti adal dita: uray kasano’t kalaingmo no mapukawen ti respeto iti kinataom, dumteng ti karma a kas dusam. Iti sabali a benneg...tay pang-Olympic a kailiantayo a ni H. Diaz...nagsentruan ti saritaan ken kontrobersiya gapu iti panagkiddawna (kano) iti suporta manipud gobyerno tapno makapagsanay a husto sakbay iti Olimpiyada iti masungad a tawen. Iti tuno ti postingna iti FB, agkidkiddaw daytoy iti pinansiyal a tulong. Ngem sinungbatan a sigida ti gobyerno ti nakuna a kiddaw. Nasursurok met gayamen ti naited a pinansiyal a suporta kenkuana sipud pay nangabak daytoy iti weightlifting championship. Bastante met gayam iti suporta a mas dakdakkel payen ngem iti kiniddawna. Ti adal dita: isu ngata ti agkidkiddaw iti pinansiyal a suporta wenno adda mangar-aramat kenkuana? Rumbeng a maresolba ti nakuna a kontrobersiya sakbay a maapektaran ti panagsanay ti kailiantayo a kampeon.
***
Ditoy Baguio City...limtuad met ti maysa a kontrobersiya. Daytoy ket ti pannakaaramat ti nagan ni Mayor-elect Benjie Magalong. Susmaryusep! Dipay nagtugtugaw a kas mayor...addan agar-aramat iti naganna? Ania aya ti eksena? Babaen iti pannakainnuman ti Tambalang Edong Carta ken Jimmy Luzano program ti Z-Radio, Baguio...imbutaktak ni Ret. Genenal Benjie Magalong a nakadanon kenkuana ti awag manipud kadagiti panganan dita city business district. Adda kano tao wenno grupo a nagorder iti makan a kas bilin kano ni Gen. Magalong. Inulit-ulit ni Gen. Magalong nga awan kinapudnona iti inaramid ti suspect. Addan inruanganna nga imbestigasyon ken surveillance panggep iti nakuna a kontrobersiya. Tssk tsk...piman met ni Apo Magalong.
Dipay nagak-akem a kas baro a mayor ti Baguio...addan dagiti sairo a nakapalikmut kenkuana. Maymaysa laeng ti makitami a rason: nasingpet unay a tao ni in-coming mayor isu a iti panangipagarup dagiti sairo ket nalakada a lukuen. Ngem ditakayo a nagbiddut. Nadagsen ti kapadasanna iti intelligence ken serbisyo-otoridad. Eksperto daytoy iti adu a suli ti serbisyo-PNP iti napaut a panawen agingga idi naipatugaw a kas dauluen ti CIDG ken naipaima pay kenkuana ti imbestigasyon iti napasamak kadagiti SAF-44. Sayang...no sibibiag la koma daydi lolok, kaduam koma itan apo Magalong tapno surotenyo ti tuggot dagita a sairo. Ammok, maymaysa laeng ti kararag daydi lolok: matiliw koma ken madusa dagita a mananggundaway iti kabiitan a panawen. Idi kano panawen ti hapon, istorya pay ni lolok...ukisanda kano ti dapan dagiti managdakdakes sada patarayen iti kadaratan. Ala, Apo Magalong...urayenmi ti updates iti napasamak kadakayo.
***
Rehab ti Marawi...nabuntog kano. Dayta ti sangsangkamaysa a karirikna dagiti umili iti agdama nangruna kadagiti biktima ti gubat dita a disso. Kuna met ti gobyerno nga adda mapan iti P500M a pundo ti nailatang iti HUDCC para iti Bangon Marawi. Ngem babaen iti panangibutaktak ti COA...naaramat kano iti sabali ti paset ti nakuna a pundo. Depensa met ti Bangon Marawi nga uray maysa a kusing ket awan naksay iti nasao a pundo no di ketdi maiyur-uray laeng iti umno a pannakaiyusuat ti rehab iti sinudek ti gubat a Marawi. Tsk tsk...makaulawen ti nakuna a kontrobersiya. Maysa laeng ti kidddaw ti kaadduan: ituloyyon ti rehab iti Marawi tapno di kaasi dagiti agindeg dita a biktima ti gubat itay kallabes a panawen. Dita a masidir ti kari ken plano ni Pres. Duterte para kadagiti taga-Marawi.
***
Intayon sublian ti isyu ti Abu Sayyaf. Agsisimparat kada agtutuon dagiti saludsod iti agdama ngem ti kadagsenan ket ti: apay a a saan a mapulbos ti nakuna a grupo dagiti terorista idinto ta bassit laengen ti bilangda? Kunada...no mapalubosan laeng koma ti puwersa military, apagbiit laeng kano a pulbusenda dagita nga Sayyaf. Ngem adda dagiti banag a maikonkonsidera: adda dagiti maapektaran a kautibo wenno balud nangruna no dagitoy ket gangannaet ken kasta met dagiti sibilyan iti asideg dagiti nagkampuan dagiti terorista. Iti kaudian a report, mapan laengen kano iti bilang a sangaribu ti puwersa ti Abu Sayyaf.
Ket gapu ta awanen ti natda pay a baludda...awanen ti rason tapno rebbekenen ti AFP dayta a grupo. Ti kaudian a biktima dagiti terorista ket ti Dutch national a ni Ewold Horn a pinapatayda idi May 31 idi kasagsagan ti enkuwentroda kadagiti tao ti military. Sipud nagtugaw a presidente ni Pres. Duterte, manon a gangannaet ti pinapatay (pinatgedanda) dagiti terorista a pakaibilangan da Juergen Kantner, German, dua a Canadians – John Ridsdel ken Robert Hall ken dadduma pay. Maulit nga awanen ti natda a balud dagiti terorista. Maymaysa itan ti puntirya ti AFP – pangpulbosen kadagiti terorista sakbay a makapag-recruitda wenno makaalada manen iti baro a balud. Sapay koma ta kastan ti mapasamak, pards, tapno aggibusen ti kinaranggasda. Sapay koma met ta iramandan nga ibusen dagiti dadduma pay a grupo dagiti terorista dita lumaud. Adios mi amor, ciao, mabalos!