KITANG tanan pulos nakasabot sa kumon nga pulong negusyo, bisan pa og igo-igo lang ang imong grado nakasabot gyud ta basta magnegusyo ka, ang importante sa tanan, ginansya di ba?
Karong panahona mora og mga uhong kining mga money investment schemes nga nanurok sa atong palibot ug nakapagulyang sa katawhan.
Dunay natintal, duna sa’y wala, kay lagi kulang sa pagtuo, gilaliman ka ba nga dunay 30 porsiyento, 40 porsiyento, 50 ngadto sa 60 porsiyento?
Kini nagpasabot lang nga ang nag-unang poblema sa tawo kwarta, mangawat ka, aron makakwarta, manulis ka aron makakwarta ug kon gikinahanglan, mopatay ka himuon nimo tungod ug alang sa kwarta.
Kung negusyo, unsang klaseha sa negusyo kini nga ang imong P1, himuong P5, ug imong P10,000 himuong P50,000 sud lang sa usa ka bulan, nga ang kumon sa business is profit di ba?
Matud pa sa uban nga mo-isplikar, Forex current trading, gibase ang atong peso sa mga langyaw nga salapi o stock market.
Pero di nalang nato palawman ang pagpanuki-duki mahitungod niini, kay kulang kita sa kaalam kung negusyo na ang hisgutan.
Ang gamay lang nato nga nahibaw-an mahitungod niini, kung mubo ang peso sa dolyar, mamalit ka og dolyar, pananglit kung ang usa ka dolyar P45 sa atong peso, mamalit kag daghan, ug imong e stock, kung moabot ang panahon nga ang 1,000 dolyar 55 na sa atong peso, mobaligya kana og dolyar kay may ginansiya sa kana nga P10,000.
Pero diha ra kutob ang atong nahibaw-an mahitungod niini, kung unsa pama’y pinakalawon nga ugat niining negusyoha? Kamo na’y sumpay.
Ang importante lang giyahan sa atong gobyerno sa pag-regulate, kay mosugot kita’g sa dili, nakatabang kini og dako sa mga pobre nga mahaw-as intawon sila sa tumang kalisod, dili aron madatu.
Kining negusyo nga dili masabtan, atong apilan, pero sa maka-usa pa kay sugal mani, ayaw ipusta ang imong tanang kayamanan, kay kun mapildi ka, basig magdahig kana lang unya sa yuta ug wala na’y kadangpan.