MAGUINDANAO -- Anam-anam na nga napuhag ang mga miyembro sa Bangsamoro Islamic Freedom Fighters (BIFF) sa probinsiya sa Maguindanao.
Kini ang gikomperma sa Joint Task Force Central sa militar nga gipangulohan ni 6th Infantry (Kampilan) Division Chief, Major General Cirilito Sobejana.
Sunod-sunod nga gisulong sa mga sundalo ang gitagoan sa BIFF sa Liguasan Delta ug SPMS Box sa Maguindanao.
Tulo ka pundok sa BIFF ang gipunting sa JTFC nga gilangkuban sa grupo nila Kumander Bungos, Kumander Karialan ug Kumander Abu Toraife.
Apan ang pinaka-ngilngig niini ang ikatulo nga pundok nga gipangulohan ni Shiek Esmail Abdulmalik alyas Kumander Abu Toraife nga dunay direkta nga pakig-alayon sa Islamic State of Iraq and Syria (ISIS).
Nalambigit ang grupo ni Kumander Abu Toraife sa pagpamomba sa nagkadaiyang dapit sa Central Mindanao.
Gisudlan sab niini ang kidnapping, extortion,
robbery, carnapping, illegal drug trade ug uban pa.
Ang grupo sab nila Kumander Karialan ug Kumander Bungos una nga namahayag nga buot nila nga muduyog sa nakab-ot nga kalamposan sa Bangsamoro Organic Law.
Wala magkompiyansa ang Joint Task Force Central bisan nagkaluya na ang BIFF ug anaa sila sa hugtanon nga pagbantay alang sa seguridad sa katawhan. (Edgar Fuerzas)