KIDAPAWAN CITY -- Duha ka bigtime drug traffickers ang nadakpan alas 12:30 sa udto niadtong adlaw nga Sabado sa utlanan sa Lanao del Sur ug North Cotabato.
Giila ang mga suspek nga sila Darangi Ombo Angatong, alyas Salaudin ug si Lendi Mangondacan, pulos nagpuyo sa Purok 7, Kapigis, Barangay Eastern Wao, Lanao del Sur duol lamang sa Banisilan North Cotabato.
Gibutyag ni PRO-BARMM director Police Brigadier General Marni Marcos Jr., nga gironda sa hiniusang puwersa sa PDEA-BARMM, Lanao del Sur PPO, CIDG-BARMM ug 34th Infantry Battalion Philippine Army ang gitagoan sa mga suspek.
Apan misulay sa pagsukol sila Angatong ug Mangondacan hinungdan nga sila naangol.
Gipangdala ang mga samaron sa Wao District Hospital diin anaa sila sa talandugong kahimtang nga naka-angkon og mga samad pinusilan sa nagkadaiyang parte sa ilang kalawasan.
Narekober gikan sa mga suspek ang duha ka kalibre .45 nga pistola, mga bala ug P6.8 Milyon kantidad sa shabu.
Ang mga suspek nalambigit sa illegal drug trade sa Lanao del Sur, Bukidnon ug North Cotabato nga padayon karong giimbestigahan sa otoridad. (Edgar Fuerzas)