DAVAO DEL SUR -- Human nabalita nga pasirad-an ang Kabus Padatoon (Kapa) Ministry International, Inc. tungod sa mando ni Presidente Rodrigo Duterte, nagsalimuang na ang mga sakop sa Kapa dinhi sa lalawigan.
Nasayran nga pipila na kanila ang miatras pinaagi sa pagbawi sa ilang kwarta ngadto sa nangankon nga relihiyosong organisasyon.
Sayo sa buntag, usa ka negusyante nga nakabase sa Davao City ang nagkapa-kapa padung sa Sta. Cruz, Davao del Sur aron adtuon ang opisina sa Kapa sa pamasin nga makuha nila ang gipatulog nga kwarta.
Samtang nagbiyahe ang anak nga negusyante, nagsalimuang sab og panawag ang iyang amahan sa cellphone nga nag-apura nga bawion ilang kwarta kay basin maunhan sila.
Gawas sa ilang tinguha nga bawion ang ilang nabutang nga kwarta, daghan sab kanila ang nagyawyaw pinaagi sa social media human nakita ang video sa live interview ni Pastor Apollo Quiboloy ngadto kang Presidente Duterte kalabot sa Kapa niadtong Sabado.
Si Quiboloy maoy gipasanginlan sa mga netizens nga maoy nagtukmod sa presidente nga pasirad-an ang mga investment schemes ilabi pa ang Kapa nga nagakolekta og salapi sa pagtakuban nga donasyon bugti sa 30 porsyento nga interes o gitawag nga love gift sa mga sakop niini.
Usa si Analyn nga nag-post sa Facebook sa iyang kaaligutgot kay alang niya dako og gikatabang kanila ang Kapa.
“Unya mayo ra ba’g nay gobyerno nga motabang namo. Kana si Quiboloy di man gani na mohatag sa ilang mga miyembro kay puro ra na sila panugo nga mangayo og donasyon pero wa gyu’y mabalik sa ilaha,” sa iyang mensahe.
Daghan pang mga netizens ang nibatikos ngadto kang Quiboloy human mitay-og sa mga sakop sa Kapa ang maong balita.
Si Duterte sa iyang pamahayag nga naka-live streamed sa YouTube, atubangan ni Quiboloy, nagmando ngadto sa otoridad ug National Bureau of Investigation (NBI) nga pasirad-an ang Kapa sa hinanaling panahon.
“To the CIDG, the police, the special investigating teams including NBI, that is pyramiding. That is why you shut them down and haul them (to courts) upon my orders,” asoy ni Duterte.
Samtang, daling milimod si Pastor Joel Apolinario, ang founder sa Kapa, nga dili sila apil sa pasirad-an sanglit kumpleto ang ilang mga dokumento.
Si Apolinario sa usa ka video sa YouTube niadtong Sabado, miawhag sa mga sakop sa Kapa nga dili angayang mabalaka ug usa ka pagsulay lamang ang ilang gikatagbo karon.