TUKION sa Provincial Board (PB) sa sisyon karong adlawa, Hunyo 10, ang lakang sa pagmando sa bolutaryong pagkuha sa tanang pork meat products nga ginama gikan sa mga nasod nga giingong naapektohan sa African Swine Fever.
Ang resolusyon gipasaka ni reelected first district PB Member Raul Bacaltos,nisugyot sa pagsagop sa Food and Drug Administration Advisory 2019-127, diin nagpasidaan sa publiko sa pagpalit ug pagkaon sa processed pork meat.
Ang mga nasod nga napektohan sa ASF virus naglakip sa Russia, Ukraine, Czech Republic, Moldova, South Africa, Zambia, Hungary, Bulgaria, Belgium, Latvia, Poland, Romania, China (lakip sa Hong Kong ug Macau), Mongolia, Vietnam ug Cambodia.
Sa dakbayan sa Sugbo, kapin na sa 2,000 canned goods gikan sa mga nasod nga dunay ASF ang gipangkuha sa the City’s Department of Veterinary Medicine and Fisheries (DVMF) gikan sa nagkalainlaing supermarkets sa dakbayan.
Samtang, unom ka sugyot ordinansahon nga naka-ung-ong sa lainlaing mga komitiba sa Cebu Provincial Board ang kinahanglan nga iduso og balik sa mga nagpanday niini.
Sumala ni manlalaban Pulchra Marie Acevedo, secretary sa SP, kinahanglan i-refile ang mga ordinansahon gumikan kay lahi na usab ang mga miyembro nga molangkob sa 15th Sangguniang Panlalawigan.
“Na-agenda na for 1st or 2nd, ang mga members who approved during the reading, during gi-calendar ang title sa 2nd reading, sa deliberation are not same members. So, balik gyud sa uno,” pasabot ni Acevedo sa mga tigbalita niadtong Biyernes, Hunyo 7.
Duha sa mga ordinansahon nga na-pending kay gipangamahan ni reelected PB Member Horacio Paul Franco sa ikaupat nga distrito.
Kini kabahin sa load limit sa mga trak nga nagkarga og materyales gikan sa quarry operations nga moagi sa provincial roads ug pagpangayo og parking fee sa mga sakyanan nga mo-park sa Larsian sa dan B. Rodriguez, siyudad sa Sugbo.
Apil usab ang ordinansahon bahin sa water code sa lalawigan nga gi-draft sa Provincial Water Resources Authority nga nag-ung-ong sa committee on environmental conservation and natural resources ni PB Member Thadeo Jovito Ouano.
Lakip usab ang ordinansahon nga giduso ni reelected PB Member Yolanda Daan sa unang distrito bahin sa persons with disabilities.
Ug ang mga ordinansahon nila ni outgoing PB Members Sun Shimura labot sa amendment sa accreditation sa mga rekisitos sa mga senior citizens ug Earl Tidy Oyas bahin sa drug-free workplace sa mga buhatan sa lalawigan sa Sugbo.
Si Sun nidaog pagka mayor sa lungsod sa Daanbantayan sa miaging piniliay niadtong Mayo 13 samtang pagka bise mayor si Oyas sa lungsod sa Catmon.
Gikan sa 2016 hangtod sa 2019 sa ika-14 nga SP, niabot og dul-an 3,000 ang napalabang nga committee reports, 50 ang mga ordinansa (regulating ug appropriation) ug kapin sa 4,000 ang mga resolusyon.
Si Acevedo nipasabot ang committee report mao ni ang review power sa mga bokal sa mga ordinansahon sa ilang mga kauban o kadtong gikan sa kalungsuran ug mga siyudad nga ubos sa hurisdiksyon sa lalawigan.
Karong buntag, makigtagbo si Vice Gov-elect Hilario Davide III sa mga molangkob sa 15th SP aron sabotan kon usbon, dungagan o sagupon ang Internal Rules of Procedure sa kasamtangang 14th SP.
Apil sa motunga si reelected Samboan Councilor Irving Gamallo, kinsa maoy molingkod isip ex officio member sa PB gikan sa Hulyo 1 hangtod sa Agusto, isip representante sa Philippine Councilors League-Cebu Province Chapter ug puli ni Oyas, samtang wala pa makapili og bag-ong mga opisyal ang ilang pundok sa mga konsehal. (SCG)