ANG Cebu City Government mohatag na sa financial assistance sa senior citizens ug persons with disability (PWD) karong Hunyo 13 ug 14 sa 80 ka barangay.
Kini ang katapusang pag-release ni outgoing Mayor Tomas Osmeña sa tag P1,000 matag buwan sa dili pa molingkod si Mayor-elect Edgardo Labella isip labing taas nga opisyal sa dakbayan sa Sugbo.
Ang venue adto gihapon sa mga lugar diin gipahigayon ang distribution niadtong buwan sa Mayo sa matag barangay diin snakadawat og P2,000 ang mga edaran sanglit naapil ang buwan sa Abril.
Si City Councilor-elect Lea Japson, kanhi pangulo sa Department of Social Welfare and Services (DSWS) niawhag ngadto sa mga benepisyaryo nga magdala sa ilang mga identification card (ID) gikan sa Office of Senior Citizen Affairs (Osca) ug ID sa PWD para sa ilang dali nga pagkobra.
Ang senior citizen ug PWD adunay P12,000 nga ilang madawat matag tuig kon P1,000 kada buwan.
Gipaabot nga mapun-an ang 75,009 ka senior citizen nga makadawat sa tag P12,000 matag tuig human giaprobahan ang usa ka amendatory ordinance sa City Council.
Sa balaudnon nga gipangamahanan ni City Councilor-elect Eugenio Gabuya Jr., ang mga senior citizen nga narehistro sa Commission on Elections (Comelec) niadtong tuig 2011, 2012 ug 2013 maapil na sa makadawat sahinabang.
Apan kinahanglang pa kining tugotan sa mayor ug niining puntoha ni outgoing mayor Osmeña kun incoming mayor Labella.
Sa City Ordinance 2453 nga gipanday ni Labella dihang konsehal pa siya, kadto lang senior citizen nga narehistro sa Comelec niadtong tuig 2010 paubos ang makapahimos sa maong ayuda, tukma sa pag-aproba sa balaudnon. Apan ang senior nga nibalhin sa Cebu City ug narehistro sa 2014 pataas, way labot sa financial assistance. (PAC)