SECTIONS
Monday, August 26, 2019
SUPERBALITA CEBU

Bus, mini-bus operators miprotesta

MAMBALING UNDERPASS: Ang hulagway sa underpass sa eskina sa N. Bacalso Ave., ug F. Llamas St., Barangay Mambaling, dakbayan sa Sugbo nga nakuha sa Sun.Star sa miaging buwan nga hapit na mahuman ug sa pagkakaron gihimo na lang ang pinal nga trabaho. Gikatakda kini nga matapos ning buwan ug ablihan na sa trapiko karong Hunyo 15. Apan, ang operators sa bus ug mini bus niprotesta sa plano sa Cebu City Transportation Office nga jeepneys ug pribadong sakyanan lang ang makaagi sa underpass. Istorya naa sa pahina 3. (Allan Cuizon)

"IT’S unfair."

Kini ang gipadayag sa chairman sa Cebu Provincial Operators Transport Cooperative nga si Barili Vice Mayor-elect Julie Flores labot sa plano sa Cebu City Transportation Office (CCTO) nga dili paagion ang mga bus ug mini bus sa underpass sa Natalio Bacalso Avenue, siyudad sa Sugbo sa higayon nga buksan na kini karong Hunyo 15.

Sumala ni Flores sa dili pa modesisyon niini ang CCTO, konsultahon una ang mga sumasakay, mga negosyante ug operators sa mga bus ug mini bus nga magbiyahian sa siyudad sa Sugbo.

“Unfair ni para namo. Dili lang ni para namo kondili hangtod sa atoang mga sumasakay. Ngano man?

Gaantos baya ang mga sumasakay ana karong panahona tungod kay diha gipaagi sa Cebu South Coastal Road (CSCR),” pahayag ni Flores sa pakighinabi sa Superbalita Cebu niadtong Dominggo, Hunyo 9.

Matod niya, luoy ang kahimtang sa mga sumasakay nga nagpuyo sa Bulacao, Poblacion Pardo, Basak ug Mambaling nga nibiyahe gikan sa habagatang Sugbo kay monaug sa eskina sa CSCR sa Barangay Lawaan 1 ug mosakay og multicab aron makaabot sa ilang gipuy-an.

Sa iyang bahin, si Francisco “Isko” Ouano, operations chief sa CCTO, namahayag nga nakasabot siya sa gibati sa mga sumasakay ug mga operator og buses ug mini buses, apan gusto nila nga mabahin ang mga sakyanan nga moagi sa CSCR ug sa N. Bacalso Avenue.

Base sa ilang obserbasyon, nakita nila nga bisan wala pa mahuman ang proyekto, huot na ang dagan sa mga sakyanan sa dapit gumikan sa kadaghan niini labi na sa peak hours gikan sa alas 7 sa buntag hangtod sa alas 10 sa buntag ug alas 4 sa hapon hangtod sa alas 8 sa gabii.

Ang 700 metros nga gitas-on nga underpass magsugod sa dan Tabada hangtod sa eskina sa Rama Compound, Barangay Basak San Nicolas, ning siyudad. Aduna kini duha ka lanes kun tagsa ka lane alang sa northbound ug southbound nga mga sakyanan.

Si Ouano niingon nga kon paagion og balik ang mga public utility buses (PUB) ug mini buses sa lugar mosamot kahuot ang dagan sa trapiko sa dapit.

“Makita nato nga grabe sad ang trapik nga wala pa gani ang buses ug mini buses. Kita kasabot man gyud ta ana no, pero ang ato man gud dili man gud ingon nga one sided, ang atong gitan-aw dinhi karon is ang traffic,” dugang niini sa buwag nga pakighinabi ning mantalaan.

Wa kauyon si Flores sa sugyot ni reelected Cebu City Councilor David Tumulak nga ang mga bus lang sa KMK Bus Transit, MyBus sa Metro Rapid Transit Services, Inc. ug Beeps sa Persano Corp. lang ang paagion sa P638 milyones nga underpass project.

“Nganong pilion ra man ang mga bus nga makaagi diha? Og duna man gani pasudlon nga mga bus ug mini bus diha, ang tanan atong paagion. Ang among original nga rota diha. Gi-divert lang mi tungod sa construction unya nganong karon nga humana ang underpass, nganong dili naman mi pasudlon,” dugang ni Flores.

Apan pasabot ni Ouano nga pipila lang ang mga bus sa maong mga kompaniya nga gigamit isip alternatibo nga kasakyan sa mga molupyo sa habagatang distrito sa siyudad.

Siya nidugang ang mga PUB usab kay point-to-point diin kon asa ang ilahang destinasyon, adto sad mosakay ug manaug ang mga pasahero.

Tinguha niya nga makigtagbo ni Mayor-elect Edgardo Labella aron mangayo og rekonsiderasyon sa plano sa CCTO.

Sigon ni Ouano sila igo morekomendar sa mayor ug anaa na niini kon unsay mamahimong desisyon bahin niini.

“Para nato man gud, nangita gyud ta’g solution kay daghan sad kaayo mga badlungon mga PUB sa atong nakita,” dugang ni Ouano.

Sukad gisugdan ang konstruksyon sa underpass niadtong Agusto 2017, ang mga bus ug mini buses didto na gipaagi sa CSCR.

Samtang, ang ubang mga sakyanan apil ang mga public utility jeepney gitugotan makaagi sa dan Ganciang, dan Tagunol, dan Caimito, dan F. Llamas ug uban pa aron dili maghuot sa N. Bacalso Avenue. (B)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph