GIPASALIG sa Globe telecom nga dili na mausab pa ang nahitabo niadtong Hunyo 4 diin kalit nga nahanaw ang signal ug daghang mga negosyante ang apektado tungod sa mga na-abirya nga mga transaksiyon gumikan na usab sa maong panghitabo.
Nasayran nga nagpatawag og Committee hearing ang komitiba ni Konsehal George Goking aron matubag ang maong kalit nga nahitabo.
Atol sa maong pagdungog nangayo og pagsabot sa katawhan ug pasaylo ang tinugyanan sa Globe telecom sa mga konsumante ug nipasalig nga kutob sa mahimo nga dili na mahitabo pa ang maong insidente.
“We can definitely assure everyone, mga globe subscribers na situations like this happened we are on top of this, first we’d like to ensure that everyone is connected, second is we’ll try to ensure as well nga di na ni siya mahitabo,” matud ni James Lopez, Globe telecom’s liaison officer.
Samtang gibutyag ni Goking nga positibo usab ang maong gipatawag nga pagdungog human nga gihatagan og pagtagad sa Globe gani duna na silay mga nasabotan nga mga angayang himuon nga dili na mautro pa ang nasinatian nga kalit nga pagkawala sa signal diin dili maka-text, tawag ug paggamit sa data.
Nasayran nga daghan ang apektado nga mga negosyo atol sa pagkahanaw sa maong signal sa globe lakip na ang sa mga ATM ug ubang mga transaksiyon.
“It was very bad for a lot of us, naka create biya to siya og problema, panic, so akong ingon that can you assure us nga naay early emergency broadcasting to inform, there will be a system nga ilang e-inform ang public through another system, like pud ang City Disaster Risk Reduction Management Department (CDRRM), naa man silay radio communication,” matud ni Goking.
Gitun-an karon ni Goking ang pagpasa og ordinansa kalabot na niining maong panghitabo.
Nasayran nga kalit nga nahanaw ang signal niadtong Hunyo 4 ug rason niini mao ang pagkaputol sa mga submarine cable.
Gitambongan ang maong pagdungog sa Globe Telecom, Smart, National Telecommunications Commission, ug lakip na sa Oro Chambers ug uban pa.