DAGHAN ang nakurat dihang usa ka balay sa kagawad ang gironda sa mga operatiba sa Criminal Investigation and Detection Group (CIDG) niadtong Biyernes sa alas 5:00 sa buntag sa Brgy. Sta. Ana, lungsod sa Tagoloan, Misamis Oriental.
Gisilbi sa mga operatiba ang search warrant batok kang Konsehal Roger Achas human gialegahan nga naghupot og armas ug mga buhing bala.
Si Police Chief M/Sgt. Noel Oclarit sa CIDG niingon nga nadungog na nilang maghupot kini og armas hinungdan ila kining giaplayan og search warrant sa korte.
Nga giisyu sab ni Judge Mirabeaus Undalok ang presiding judge sa RTC 10, branch 23.
Gibutyag ni Oclarit nga ilang gituktok ang panimalay ni Achas apan walay nitubag hinungdan ilang gisulod.
Nasayran nga niambak sa bintana si Achas apan paglingi niini mga operatiba sa CIDG iyang nakita uban sa mga witness nga opisyal sa ilang dapit hinungdan nga mitahan ug maoy nagtultol sa kapolisan asa nahimutang iyang mga armas.
Nakuha sa panimalay ni Achas ang duha ka kalibre 45, usa ka KG9 submachine gun ug duha ka mazagine alang niini, 35 ka buhing bala alang sa kalibre 45 ug laing 35 ka bala alang sa 9mm pistol.
Gipasabot niini nga self defense ang rason sa paghupot sa armas ug pipila niini giprenda lang kaniya.
Apan giklaro ni Oclarit nga mga armas nga nakumpiska gikonsidera nga loose firearms human wala kini ma renew ug expired na.
Tungod sab kay tulo kini nga armas walay piyansa niini.
Si Achas numero unong konsehal nga napili sa lungsod niadtong niaging eleksyon Mayo 13.