ARESTADO ang onse ka mga batan-on human nagkarambola sulod sa food court sa 3rd floor sa Robinson's Place sa Tubod Highway sa siyudad sa Iligan niadtong Hunyo 7.
Ang maong mga indibidwal naila nga sila si Mubarac Macabalo, 23, Juhari Baniaga, 19, Muhamad Haslie, 22, Mus-ab Salic, 24, Fahad Baniaga, 24, Imaludin Macabando, 24 ug usa 17 anyos nga pulos residente sa Buadinsuba, Mulondo, Lanao del Sur lakip usab sila si Deckkie Pagayawan, 43, minyo, Muhamad Hafis Pagayawan, 18 ug laing duha ka 17 anyos kinsa pulos residente sa Muntai, Malabang, Lanao del Sur sa laing grupo.
Sa nahipos nga impormasiyon gikan sa kapulisan sa Iligan City Police Station 4 sa Tubod gikabutyag nga sa wala pa ang maong pagkarambola duna nay mga argumento sa wala ikabutyag nga rason tali sa duha ka mga grupo diha pa lang sa escalator sa maong mall.
Nakuhaan sa usa sa mga kustomer og video ang maong kagubot nga milungtad sa 3 ka minutos ug 40 ka segundos diin makitang dunay pagsinukmagay ug paghapak og bangko sa ubay-ubay ka mga indibidwal samtang nanagan usab ang mga ubang kustomer nga niani og daghang mga komento human gi-upload sa social media.
Mokabat sa P20 mil ang natalang damyos sama sa lamesa, bangko ug mga baso atol sa kagubot.
Sa pagkakaron ang maong mga indibidwal ang kasamtangang anaa sa buhatan sa kapulisan ug ang mga menor de edad ang gidala usab sa hingtungdan nga ahensiya ilabi na sa City Social Welfare and Development.